Kriza energjetike ishte tema kryesore e bisedimeve mes kryeministrave të Bullgarisë dhe të Republikës së Maqedonisë së Veriut, Gëllëb Donev dhe Dimitër Kovaçevski, në Sofje. "Ne do të bashkohemi me Bullgarinë për të gjetur një zgjidhje për furnizimin me energji elektrike. Jemi dakorduar që deri të mërkurën të formojmë një grup pune me pjesëmarrjen e ministrive të ekonomisë dhe energjetikës të Republikës së Maqedonisë dhe Bullgarisë, i cili do të diskutojë për mundësitë teknike për furnizim me energji elektrike”, tha kryeministri i RSM Kovaçevski në një konferencë pas takimit. U diskutuan mundësitë për eksport nga Bullgaria të kapaciteteve shtesë të energjisë elektrike për nevojat e ekonomisë dhe të konsumatorëve familjarë në RSM. Bëhet fjalë për 200 MWh energji elektrike bazë për periudhën deri më 31.03.2023, tha Donev.

U diskutua edhe thellimi i bashkëpunimit përmes transmetimit dhe depozitimit të gazit natyror. Të dyja palët do të bien dakord të rezervojnë vëllime të caktuara të magazinimit të gazit natyror në impiantin e depozitimit të gazit të Bullgarisë në Çiren, në mënyrë që RSM të mund të përfitojë plotësisht nga pjesëmarrja e saj në terminalin e interkonektorit dhe të gazit të lëngshëm që po ndërtohet në Aleksandropolis, Greqi.