Shtetet e Bashkuara do të përgjigjen në mënyrë vendimtare nëse Rusia përdor armët bërthamore në Ukrainë, dhe pasojat për Federatën Ruse do të jenë katastrofike, tha Këshilltari i Sigurisë Kombëtare i Shtëpisë së Bardhë, Jake Sullivan. Ai i tha NBC se Moska u informua në detaje cilat do të jenë pasojat e një përshkallëzimi bërthamor.

“Ne kemi mundësinë të flasim drejtpërdrejt në një nivel të lartë me rusët, t’u tregojmë atyre qartë se cili është mesazhi ynë dhe të dëgjojmë mesazhin e tyre”, tha këshilltari.

Uashingtoni është i bindur se udhëheqësi rus Vlladimir Putin dëshiron të “fshijë” popullin ukrainas dhe për këtë arsye, Uashingtoni do të vazhdojë t’i sigurojë Kievit armë, municione, inteligjencë dhe ndihmë të tjera, tha Sullivan.

“Kushdo që ka një armë bërthamore duhet të merret seriozisht. Nëse ai po bën blof apo jo, do të shohim. Sipas mendimit tim, në këtë situatë nuk do të përdorej asnjë armë bërthamore. Për të marrë vendim për përdorimin e armës bërthamore si përgjigje, ekziston një grup i posaçëm që i merr këto vendime me unanimitet të plotë”, komentoi për “Nova TV” ushtruesi i detyrës së Ministrit të Mbrojtjes, Dimitër Stojanov.