Turqia – qendra e shpërndarjes së gazit rus?
Evropa do të jetë në gjendje të blejë gaz natyror rus përmes Turqisë. Këtë e la të kuptohet Presidenti i Turqisë, Rexhep Erdogan, pasi presidenti rus Vladimir Putin kishte sugjeruar më parë që Turqia të bëhej një qendër për karburantin blu rus. Sipas presidentit rus, Ankaraja mund të ndërtojë një qendër shpërndarjeje nga e cila gazi mund të arrijë në vende të tjera, kryesisht evropiane, nëse ata janë të interesuar, njoftoi Euronews Bulgaria. Erdogan njoftoi se puna është planifikuar të fillojë sa më shpejt të jetë e mundur. Vendndodhja më e përshtatshme do të ishte Trakia, në pjesën evropiane të vendit, ku ndodhet një degëzim i gazsjellësit “Rryma Turke”.
Do të duhen të paktën tre deri në katër vjet dhe miliarda dollarë investime për të ndërtuar infrastrukturën e nevojshme, por pyetja kryesore mbetet - a do të ketë blerës evropianë për këtë gaz, tha para lenta.ru Igor Jushkov, një analist rus nga Fondi Kombëtar i Sigurisë së Energjisë.
Italianët privatizuan portin në Igumenicë të Greqisë
Kompania italiane e anijeve “Grimaldi” privatizoi për mbi 84 milionë euro portin në Igumenicë. Ky është investimi i dytë më i madh i Italisë në Greqi, pasi hekurudhat italiane shtetërore privatizuan ato greke në 2017. Kompania italiane theksoi se privatizimi i portit në Igumenicë është një objektiv strategjik për të thithur fluksin gjithnjë në rritje të mallrave që arrijnë në të nga Bullgaria, Turqia dhe Rumania dhe prej andej shkojnë në portet italiane të Barit, Brindisit dhe Ankonës - linjat e shërbyera prej saj, raportoi korrespondentja e BNR në Itali Elena Shahanova. Kështu, së bashku me hekurudhat greke të privatizuara, Greqia bëhet një lidhje ideale ballkanike nga dhe për në Evropë përmes Apenineve.
Rumania dhe Kuba do të bashkëpunojnë në kujdesin shëndetësor
Ministri rumun i shëndetësisë Alexandru Rafila dhe homologu i tij kuban José Angel Portal Miranda nënshkruan të martën në Havana një marrëveshje për bashkëpunimin shëndetësor midis Rumanisë dhe Kubës, raportoi Radio Romania International. Ministrat diskutuan për mundësitë e shkëmbimit të praktikave të mira në shëndetësi, trajnimin e mjekëve dhe bashkëpunimin në fushën e industrisë farmaceutike. Gjatë vizitës së tij, Rafila mbajti një raport në konferencën ndërkombëtare "Kuba-Shëndeti 2022".
Presidenti i Kroacisë: Nuk do të trajnojmë trupat ukrainase
Presidenti i Kroacisë, Zoran Milanovic, njoftoi për mediat se si komandant suprem i forcave të armatosura të vendit, do të kundërshtojë idenë e trajnimit të ushtarëve ukrainas në Kroaci, raportoi Radio Televizioni Kroat (HRT), cituar nga “Focus”. "Unë nuk e mbështes këtë ide, sepse nuk e mbështes pjesëmarrjen e Kroacisë në këtë luftë më shumë seç duhet. Ne jemi korrektë, jemi të bashkuar dhe kaq. Nuk më pëlqen ideja sepse kjo do të nënkuptonte sjelljen e luftës në Kroaci”, tha Milanovic.
Serbia fillon të prodhojë dronë të saj
Serbia do të fillojë prodhimin e dronëve të saj “Pegas” për nevojat e ushtrisë së saj, transmetoi rtv.rs. “E ardhmja e industrisë së mbrojtjes janë mjetet ajrore pa pilot, robotët dhe inteligjenca artificiale, kështu që ushtria jonë nuk do të mbetet prapa trendeve botërore”, tha ministri serb i mbrojtjes, Nebojsha Stefanoviç. Dronët e parë “Pegas” do të bëhen pjesë e armatimit deri në fund të vitit, pas së cilës do të fillojë prodhimi i tyre serial. Zbatimi i projektit "Pegas" - një nismë që zbatohet në vazhdim të disa viteve nga inxhinierët vendas - vështirë se do të ishte e mundur pa ndihmën e Kinës, theksoi RTS. Ndihma teknologjike për kompletimin e dronëve serbë ishte pjesë e së njëjtës kontratë sipas së cilës Serbia mori dronët kinezë CH-92 në vitin 2020. Kinezët ndihmuan me optoelektronikën, autopilotin dhe softuerin. Fillimisht dronët serbë do të jenë të armatosur me raketa kineze, e më pas me armë vendas. Dronët janë të kompletuar me një stacion tokësor, i cili është një punim serb, por ai do të ishte i pamundur pa pjesëmarrjen kineze.
Përpiloi: Miglena Ivanova
Përgatiti në shqip: Vesella Mançeva
Foto: arkiv, ЕPА/BGNES, salud.msp.gob.cu,mod.gov.rs
Në fillim të konsultimeve politike për emërimin e ushtruesit të detyrës së kryeministrit dhe të qeverisë së re të përkohshme, kreu i shtetit tregoi se praktikisht ka nisur fushata zgjedhore. Sipas Rumen Radevit, Asambleja e 50-të Kombëtare nuk ka..
Në javët e fundit, qeveria e re në Maqedoninë e Veriut, e udhëhequr nga Hristijan Mickoski, çuditërisht kërkoi që të ndërpritet ndërtimi i linjës hekurudhore drejt Bullgarisë. Argumentet e palës maqedonase janë se projekti për ndërtimin e hekurudhës..
Serbia raporton rënie të emigrantëve dhe mbyll disa qendra të refugjatëve Komisionerja për Refugjatët dhe Migrimin e Serbisë, Natasha Stanisavlleviç, bëri të ditur se numri i emigrantëve në vend u ul me 80% dhe u vendos që përkohësisht të..