Presidenti gjerman Frank-Walter Steinmeier mbërriti për një vizitë të paparalajmëruar në Ukrainë, raportoi Reuters. Kjo është vizita e parë e Steinmeier në Ukrainë që nga pushtimi rus dhe vjen një ditë pasi Steinmeier pranoi kredencialet e ambasadorit të ri ukrainas në Berlin, Oleksij Makeev. Presidenti gjerman do të takohet me homologun e tij ukrainas Volodimir Zelenski. Në prill, Zelenski refuzoi të priste Steinmeier, për shkak të politikës së tij si ministër i jashtëm tek kancelarja Angela Merkel për afrimin me Moskën dhe angazhimin energjetik me Rusinë. Vizita e Steinmeier vjen pasi Gjermania rriti ndihmën e saj ushtarake për Kievin.

Të martën në Berlin, Presidentja e Komisionit Evropian Ursula von der Leyen dhe kancelari Olaf Scholz do të hapin konferencën e organizuar nga BE-ja dhe G-7 për rindërtimin e Ukrainës pas luftës, në të cilën do të shqyrtohet "Plani i ri Marshall" për stabilizimin e ekonomisë ukrainase. Presidenti ukrainas Volodimir Zelenski do të mbajë një fjalim video në forum.