Lidhja midis vendeve të Ballkanit Perëndimor është në rritje
Kryeministrat e gjashtë vendeve të Ballkanit Perëndimor: Ana Brnabiq e Serbisë, Dimitar Kovaçevski i Maqedonisë, Dritan Abazoviç i Malit të Zi, Edi Rama i Shqipërisë, Zoran Tegeltia i Bosnjës dhe Hercegovinës dhe Albin Kurti i Kosovës nënshkruan tre marrëveshje mobiliteti në samitin e Procesit të Berlinit. Dokumentet lejojnë udhëtimin në rajon me letërnjoftim, njohje reciproke të diplomave universitare dhe kualifikimeve profesionale.
“Kjo do të mundësojë zhvillimin e një tregu të përbashkët rajonal dhe afrimin e më shumë se 17 milionë qytetarëve nga gjashtë vendet e Ballkanit Perëndimor”, ka shkruar Albin Kurti në Twitter. Në takim morën pjesë kancelari gjerman Olaf Scholz dhe presidentja e Komisionit Evropian Ursula von der Leyen, të cilët njoftuan se BE do të japë 1 miliard euro ndihmë për Ballkanin Perëndimor për të kapërcyer krizën energjetike.
Mosmarrëveshje në Ankara për gatishmërinë e Suedisë dhe Finlandës për NATO-n
Është koha që Finlanda dhe Suedia të pranohen në NATO, pasi prej kohësh kanë përmbushur kërkesat e Turqisë. Kështu tha Sekretari i Përgjithshëm i NATO-s, Jens Stoltenberg gjatë vizitës së tij në Turqi, pas takimit me ministrin e jashtëm Mevlüt Çavuşoğlu, transmeton BTA. Megjithatë, sipas Turqisë, të dy vendet nuk i kanë përmbushur kushtet e vendosura për t'u bashkuar. Erdogan ka akuzuar Finlandën dhe Suedinë se strehojnë luftëtarët kurdë që Ankaraja i konsideron "terroristë" dhe se nuk i kanë dorëzuar Turqisë asnjë nga njerëzit që ajo dëshiron të ekstradohen.
Finlanda dhe Suedia aplikuan për anëtarësim në NATO pas pushtimit të Ukrainës nga Rusia. Anëtarësimi në aleancë kërkon mbështetje unanime nga të gjithë anëtarët e NATO-s, përfshirë Turqinë, e cila po bllokon procesin. Kjo ishte arsyeja e vizitës së Stoltenberg. Për të kapërcyer rezistencën e Turqisë, për bisedime në Ankara më 8 nëntor do të mbërrijë edhe kryeministri suedez Ulf Kristerson.
Kroacia po numëron ditët derisa të hyjë në Shengen
Së shpejti Kroacia do të bëhet një nga 15 vendet që janë njëkohësisht anëtare të BE-së, NATO-s, Eurozonës dhe Shengenit. Kështu ka shkruar në Twitter kryeministri i vendit Andrej Plenkoviç. “Për më pak se 60 ditë, Kroacia do të bëhet anëtare e Shengenit dhe e Eurozonës. Kështu do të përfundojmë proceset kryesore reformuese dhe do të arrijmë objektivat tona strategjike, gjë që është jashtëzakonisht e rëndësishme për investimet e reja dhe zhvillimin e mëtejshëm të ekonomisë”, theksoi kryeministri.
Këshilli i BE-së propozoi që nga 1 janari 2023 të hiqet kontrolli kufitar në kufijtë tokësorë dhe detarë të Kroacisë me vendet e zonës Shengen, ndërsa në aeroporte, për arsye teknike, të hiqet nga 26 marsi. Vendimin përfundimtar për hyrjen e Kroacisë në zonën Shengen do ta marrin anëtarët e BE-së që janë pjesë e Shengenit në një takim në dhjetor, kujton BTA.
Greqia është gati të vazhdojë ndihmën ushtarake për Kievin
Presidentja greke Katerina Sakellaropoulou u takua në Ukrainë me Presidentin Volodimir Zelenski. Ajo deklaroi se Greqia është e gatshme të vazhdojë ndihmën ushtarake për Kievin, si dhe të marrë pjesë në rindërtimin pas luftës, raportoi korrespondentja e BNR në Greqi, Katja Peeva. Në delegacionin grek është edhe ministri i mbrojtjes, pasi një nga temat kryesore të vizitës është ndihma ushtarake nga pala greke. Zelenski falënderoi për dërgesën e parë të marrë me 20 tanke të prodhimit rus nga forcat tokësore të Greqisë. Sakellaropoulou i theksoi presidentit ukrainas: “Greqia qëndron që nga fillimi pa rezerva pranë jush në përpjekjet tuaja për të mbrojtur integritetin territorial dhe sovranitetin kombëtar të vendit tuaj dhe ne do të vazhdojmë ta bëjmë këtë për aq kohë sa të jetë e nevojshme”.
Në fund të nëntorit, Beogradi bëhet kryeqyteti i lojërave
Beogradi po përgatitet për festivalin më të madh të lojërave dhe kulturës pop në rajon GAMES.CON, i cili do të mbahet për herë të shtatë nga 25 deri më 27 nëntor, transmeton “Danas”. Ngjarja do të bashkojë të gjithë industrinë moderne të argëtimit dhe do t'u ofrojë vizitorëve një gamë të gjerë lojërash dhe kuize, filma, komike dhe kultura të tjera pop. Adhuruesit e lojërave video do të njohin më të rejat në industrinë e lojërave, do të provojnë lojërat më të fundit dhe do të testojnë aftësitë e tyre në turne të ndryshëm të sporteve elektronike.
Përpiloi: Miglena Ivanova
Përgatiti në shqip: Vesella Mançeva
Foto: EPA/BGNES, reuters.com, schengenvisainfo.com, president.gov.ua, danas.rs
Fitorja në dukje vendimtare e GERB-SDS në zgjedhjet për parlamentin kombëtar nuk do të thotë se partia me çdo kusht do të arrijë të formojë një qeveri në të vetmen formë të mundshme të imponuar gjatë qeverisjes së fundit, pra të ashtuquajturin..
Zgjedhjet për Parlamentin Evropian më 9 qershor 2024 kaluan pa lëkundje të veçanta për formacionet drejtuese politike. Partia Popullore Evropiane dhe socialistët mbeten në krye dhe ndoshta do të vazhdojnë të ndjekin politikat e tyre të përshkruara...
Parlamenti Evropian është organi i vetëm në BE i zgjedhur drejtpërdrejt nga qytetarët. 6 138 050 votues bullgarë kanë të drejtë të emërojnë 17 përfaqësues politikë për ta përfaqësuar Bullgarinë në Parlamentin e ri Evropian për pesë vitet e..
Kërkimi i Kosovës për anëtarësim në NATO dhe mbështetja e Bullgarisë ishin temat e diskutuara në takimin e presidentes së Kosovës Vjosa Osmani me..