Grevë kombëtare në Qipro për indeksimin e pagave sipas inflacionit
Të enjten, më 26 janar, në Qipro, mijëra punonjës të sektorit publik dhe privat, duke përfshirë nëpunës të administratës dhe gazetarë, ndaluan punën për tre orë dhe dolën në rrugë në të gjitha qytetet për t’iu bashkuar grevës së përgjithshme të shpallur nga sindikatat. Ajo mbuloi transportin publik, shkollat, spitalet, zyrat postare, portet, shërbimet publike. Kërkesat e grevistëve janë të rrisin pagat dhe të rivendosin fuqinë e tyre blerëse duke indeksuar me normën e inflacionit vjetor, njoftoi korrespondentja e BNR Branisllava Bobancs nga Qipro. Sindikatat njoftuan se ky ishte vetëm fillimi i luftës për indeksimin e pagave dhe se ajo do të vazhdojë “me çfarëdo mjeti dhe sipas nevojës”. Sipas tyre, nuk përjashtohet një përshkallëzim i mëtejshëm i masave.
Djegia e Kuranit vonoi bisedimet midis Turqisë dhe Suedisë për NATO-në
Turqia shtyri, për një datë të mëvonshme, bisedimet me Suedinë dhe Finlandën për anëtarësimin e tyre në NATO, të cilat duhej të zhvilloheshin në shkurt, njoftoi Radio dhe Televizioni turk TRT. Vendimi erdhi pasi më 21 janar kreu i partisë së ekstremit të djathtë të Suedisë “Kursi i fortë” Rasmus Palludan dogji publikisht librin e shenjtë për myslimanët - Kuranin - përpara Ambasadës turke në Stokholm. Menjëherë Ankaraja reagoi ashpër duke anuluar vizitën e planifikuar të ministrit suedez të mbrojtjes Pal Jonsson në Turqi dhe ambasadori i Suedisë u thirr për bisedime në Ministrinë e Jashtme turke. Më 24 janar, para Ambasadës Turke në Stokholm, OJQ-të turke në Suedi mbajtën një “Aksion për nder të Kuranit” dhe pjesëmarrësit morën kopje të Kuranit në gjuhën suedeze. Rasti me librin e shenjtë vjen pas një tjetër skandali, kur një shëmbëlltyrë e presidentit Rexhep Erdogan u var me kokë poshtë përballë godinës së bashkisë së qytetit në një protestë në Stokholm në mes të janarit. E gjithë kjo po ndodh në një kohë kur Suedia dhe Finlanda presin që Turqia të ratifikojë hyrjen e tyre në NATO.
Kryeministri i Kroacisë kërkoi që çmimet të kthehen në nivelet e para euros
Kryeministri kroat Andrej Plenkoviç kritikoi edhe një herë rritjen e çmimeve pas vënies së euros si monedhë zyrtare në Kroaci. Ai u bëri thirrje atyre që i ngritën çmimet jo për shkak të rritjes së kostove të lëndës së parë, të mos dëmtojnë konsumatorët, transmeton agjencia “Hina”. Plenkoviç theksoi se viti i kaluar ishte shumë i vështirë për vendin, por me masat e vendosura për ekonominë dhe ekonomitë familjare me vlerë 3.6 miliardë euro, qeveria ndihmoi që inflacioni të mbahet në nivelin nga 10.8 për qind. Ai kërcënoi se mund të tërhiqen subvencionet për kompanitë që kanë rritur çmimet në mënyrë të pajustifikueshme dhe të merren masa të tjera ndaj tyre.
Kriza politike e vë në rrezik hyrjen e Malit të Zi në BE
Kriza e vazhdueshme politike në Malin e Zi e vë në rrezik pranimin e vendit në BE. Negociatat mund të ngrihen nëse deri në fund të janarit nuk zgjidhet mosmarrëveshja për emërimin e gjyqtarëve në Gjykatën Kushtetuese. Paralajmërimi i fundit erdhi nga ministrja e jashtme sllovene Tanja Fajon, e cila tha se zgjedhjet e ardhshme të marsit në Malin e Zi nuk mund të zhvillohen pa një Gjykatë Kushtetuese funksionale. “Para se të vinte në pushtet kryeministri Dritan Abazovic, Mali i Zi ishte lider në procesin e negociatave me BE-në në rajon. Tani, më pak se një vit në qeverisjen e tij, ne jemi të kërcënuar me ngecje të negociatave. Ne kemi një qeveri që është nën ndikimin e drejtpërdrejtë negativ të Beogradit dhe gjithashtu drejtpërdrejt nën ndikimin e Moskës. Qeveria nuk bëri reformat e nevojshme, as nuk përgatiti institucionet dhe ekipet për negociata. Procesi është plotësisht i bllokuar”, komentoi në një intervistë për BNT, Momçillo Radulloviç, kryetar i Lëvizjes Evropiane të Malit të Zi.
Përpilues: Miglena Ivanova
Përgatiti në shqip: Svetllana Dimitrova
Foto: EPA/BGNES
Turqia dëshiron të anëtarësohet në BRICS Turqia ka aplikuar për anëtarësim të plotë në BRICS dhe anëtarësimi i saj do të diskutohet në samitin e organizatës në Rusi në tetor, raportojnë mediat bullgare. Nëse pranohet, do të jetë vendi i parë..
Shoqata "Pаsardhësit e refugjatëve dhe migrantëve nga territori i Republikës së Maqedonisë së Veriut dhe miq" shpërndau një letër të hapur drejtuar komunitetit shqiptar në Maqedoninë e Veriut dhe përfaqësive diplomatike të akredituara në RSM dhe..
Serbia blen avionë luftarakë “Rafale” nga Franca për 2.7 miliardë euro Për gjithsej 2,7 miliardë euro, Serbia do të blejë nga kompania franceze “Dassault Aviation” 12 avionë të rinj luftarakë “Rafale” – 9 me një vend dhe 3 dyvendësh...
Turqia dëshiron të anëtarësohet në BRICS Turqia ka aplikuar për anëtarësim të plotë në BRICS dhe anëtarësimi i saj do të diskutohet në..