Presidenti ukrainas Volodimir Zelenski i tha kreut të Agjencisë Ndërkombëtare të Energjisë Atomike, Rafael Grossi, se siguria e centralit bërthamor të Zaporozhies nuk mund të garantohet derisa trupat ruse të largohen prej tij. Rusia po mban “peng” centralin më të madh bërthamor të Ukrainës dhe Evropës, në mënyrë që ta përdorë atë për shantazh, tha Zelenski, cituar nga Reuters.

Këshilli i Sigurimit i OKB-së hodhi poshtë një rezolutë të hartuar nga Moska që kërkonte një hetim të pavarur për "sabotimin" e tubacionit të gazit “Rryma Veriore” nga Rusia deri në Gjermani në shtator 2022, raportoi AFP. Ndërkohë, Hungaria dhe katër vende të tjera, përfshirë Poloninë, iu bashkuan nismës së BE-së për furnizimin me raketa në Ukrainë, sipas një publikimi në faqen e internetit të Agjencisë Evropiane të Mbrojtjes - EDA. Kështu, 22 vende nga komuniteti dhe Norvegjia, tashmë janë zotuar të dorëzojnë 1 milion predha të kalibrave të ndryshëm në Ukrainë në 12 muajt e ardhshëm. Bullgaria, Irlanda, Sllovenia, Letonia dhe Danimarka mbeten jashtë nismës në këtë fazë.