Sekretari amerikan i shtetit, Anthony Blinken dhe ministri i jashtëm ukrainas, Dmitro Kuleba zhvilluan një bisedë telefonike dhe diskutuan përgatitjet për kundërsulmin e Ukrainës dhe ndihmën nga aleatët, thuhet në një deklaratë të Departamentit Amerikan të Shtetit. Në Twitterin e tij, Kuleba shkroi: “Shtetet e Bashkuara mbeten një partner i besueshëm i Ukrainës”. Nuk ka asnjë arsye për të dyshuar në mbështetjen e SHBA-së për Ukrainën, ka thënë Blinken në bisedë, sipas gazetës “Washington Post”.

Udhëheqësi i kompanisë mercenare ruse “Wagner” njoftoi se trupat e tij kontrollojnë mbi 80% të Bahmutit, të cilin ata e kanë pushtuar prej 9 muajsh. Lajmi u mohua nga Kievi.

Tashmë në Ukrainë ka komando të NATO-së, shkruan gazeta britanike “The Guardian”, duke iu referuar një prej dokumenteve sekrete të zbuluara nga afera e ashtuquajtur “Pentagonleaks”. Te data 23 mars, në Ukrainë kishte 50 komando britanikë, 17 lituaniezë, 15 francezë, 14 amerikanë dhe një holandez. Nuk është e qartë se ku ishin dhe me çfarë misioni, Kievi nuk e komentoi lajmin.