Greqia përgatiti një plan për të mbështetur grurin ukrainas

Për shkak të problemeve që lidhen me eksportin e grurit ukrainas përmes Detit të Zi, Greqia është e gatshme të ndihmojë procesin me një rrugë alternative për transportin e tij përmes porteve të saj në Aleksandrupolis dhe Selanik, njoftoi në Kiev ministri i jashtëm grek, Jorgos Gerapetritis. Për më tepër, plani tashmë u diskutua jo vetëm me partnerët e BE-së, por edhe jashtë bashkimit, njofton “Kathimerini”. Parashikohet, që drithërat të transportohen me hekurudhë nga Ukraina përmes Rumanisë dhe Bullgarisë deri në portet e Selanikut dhe Aleksandrupolisit. “Është e qartë se flota greke do të luajë një rol të rëndësishëm, siç ka ndodhur tashmë në raste të ngjashme”, thekson botimi. Vërehet se për shkak të problemeve me kapacitetin e rrjetit hekurudhor në Greqinë Veriore, ky plan mund të bëhet një nxitje për të përshpejtuar modernizimin e linjës Aleksandrupolis - Ormenio drejt Bullgarisë, e cila është në një gjendje të mjerueshme.

Rumunët duan të bojkotojnë kompanitë austriake për shkak të Shengenit

28%, ose pothuajse një e treta e rumunëve këmbëngulin që shteti të bojkotojë kompanitë austriake për shkak të refuzimit të Austrisë për të pranuar Rumaninë në Shengen. Këtë e tregojnë të dhënat e një sondazhi të Agjencisë Sociologjike “Avangarde”, të cituar nga Digi24. Përafërsisht po aq - 27% - janë të mendimit se Rumania duhet të padisë Austrinë në Gjykatën e BE-së. 13% e tjerë të rumunëve duan që vendi i tyre të shfrytëzojë të drejtën e vetos dhe të bllokojë vendimet e BE-së derisa Austria të pranojë vendin e tyre në Shengen. Sondazhi tregon gjithashtu se sipas 33% të rumunëve problemi është kontrolli i kufirit, dhe 31% të tjerë janë të bindur se Austria kundërshton pranimin e vendit në Shengen me urdhër të Rusisë. Vetëm 10% e rumunëve mendojnë se Rumania nuk e meriton të jetë në zonën Shengen.

Sulmet ushtarake në Irak dhe Siri pas një atentati në Turqi

Të gjitha instalimet ushtarake kurde në Siri dhe Irak janë tani “objektiva legjitime ushtarake” të Turqisë. Këtë e tha ministri i jashtëm, Hakan Fidan, pas një tentative për atentat me bombë para Ministrisë së Brendshme në kryeqytetin Ankara, më 1 tetor. Nga shpërthimi u plagosën lehtë dy policë. Dy autorët, njëri prej të cilëve vdiq në shpërthim ndërsa tjetri u neutralizua nga forcat e rendit, janë nga Partia e jashtëligjshme e Punëtorëve të Kurdistanit dhe vinin nga Siria, ku morën trajnime, njoftuan autoritetet turke. Partia e Punëtorëve të Kurdistanit mori përgjegjësinë për incidentin. Ministria e Mbrojtjes Kombëtare e Turqisë njoftoi se në ditët pas atentatit u neutralizuan dhjetëra terroristë, përfshirë në pjesën veriore të Irakut dhe Sirisë. Në total, numri i terroristëve të neutralizuar këtë vit arriti në rreth 1390 persona, dhe nga 24 korriku 2015 e deri më tani - pak më pak se 39 000, raportoi TRT. Gjithsej 58 objektiva u goditën në operacionet ajrore në Irak. “Vendosmëria jonë për të shkatërruar strofkat e terroristëve do të vazhdojë derisa terroristët gjakatarë të zhduken nga ky rajon”, tha kundëradmirali Zeki Akturk, këshilltari për marrëdhëniet me shtypin në Ministrinë e Mbrojtjes.

Lajmet e Ballkanit tani janë mbledhur në një faqe interneti

Asociacioni i Agjencive Ballkanike të Lajmeve - Evropa Juglindore (The Association of the Balkan News Agencies – Southeast Europe /ABNA-SE/) publikon çdo ditë në faqen e tij të përditësuar të internetit një informacion nga të dymbëdhjetë anëtarët e Asociacionit. Këto janë agjencitë kombëtare të lajmeve të Shqipërisë - ATSH, të Bosnjë-Hercegovinës - FENA, të Bullgarisë - BTA, të Greqisë - AMNA, të Italisë - ANSA, të Kosovës - KOSOVAPRESS, të Qipros - CNA, të Rumanisë - AGERPRES, të Maqedonisë së Veriut - MPB, të Turqisë - Anadolu Agency, të Kroacisë - HINA dhe të Malit të Zi - MINA.

Ideja për krijimin e Asociacionit lindi në vitin 1994 në një takim në Sofje të përfaqësuesve të agjencive të informacionit nga Ballkani. Mbledhja e parë e Përgjithshme themeluese e ABNA-SEu mbajt në vitin 1995 në Selanik të Greqisë. Qëllimi i organizatës është zhvillimi i bashkëpunimit ndërmjet agjencive të lajmeve nga rajoni dhe ruajtja e klimës së miqësisë dhe bashkëpunimit në Ballkan, përkujton BTA.

Përpilues: Miglena Ivanova

Përgatiti në shqip: Svetllana Dimitrova

Foto: mfa.gr, Digi24, BGNES, BTA