A është Bullgaria tërheqëse për njerëzit që detyrohen të largohen nga shtëpitë e tyre dhe që sjellin aftësi, talent dhe përvojë të vlefshme në komunitetet e huaja ku gjetën shpëtimin? Në kërkim të një përgjigjeje në vendin tonë, së fundmi tek ne u hap platforma e parë e këtij lloji për ndërmjetësimin mes refugjatëve, punëkërkuesve dhe punëdhënësve. Informacioni atje jepet në anglisht, frëngjisht, ukrainisht, rusisht, arabisht dhe gjuhë të tjera më të rralla, ndërsa ndihma ofrohet nga Fondacioni për Qasje tek të Drejtat (Foundation for Access to Rights) - FAR, në partneritet me Komisionerin e Lartë të Kombeve të Bashkuara për Refugjatët. 

Platforma funksionon prej gati dy muajsh dhe gjatë kësaj periudhe janë regjistruar 429 persona që dëshirojnë të gjejnë punë në Bullgari. Megjithatë, numri i propozimeve për ta nuk është i madh deri tani. Vetëm 18 punëdhënës të rinj kanë shpallur konkurset e tyre - 32 në numër. Megjithatë, janë rreth 10 kontrata të nënshkruara dhe për secilën procesi është i gjatë dhe me pengesa të ndryshme administrative.

Fushat kryesore për të cilat kërkohet personel nga emigrantët janë ndërtimi, hoteleria, ushqimi dhe lloje të ndryshme prodhimi. Ka shpallje rekrutimi për punë humanitare, për siguri, për restorante të ushqimit të shpejtë. Rezulton se mes emigrantëve është gjithashtu e vështirë të gjesh punëtorë për punë me kualifikim të ulët. Nga të regjistruarit në platformë, pjesa më e madhe e aplikantëve është me arsim të lartë, rreth 54%. 31% kanë arsim të mesëm ose profesional. “Ata që kanë deklaruar se kërkojnë punë me nivel më të ulët arsimor janë 9%, por këta janë persona që kanë studiuar në vendlindje, nuk kanë arritur të diplomohen dhe janë detyruar të shpërngulen në vendin tonë” – shpjegon Maria Necova nga FAR dhe koordinatore e platformës:

"Vendet e origjinës së punëkërkuesve nëpërmjet nesh janë kryesisht nga Ukraina, Siria dhe Afganistani - shpjegoi ajo në një intervistë për Radio Bullgarinë. - 30% janë nga Ukraina, 22% nga Siria, 17% nga Afganistani, ose gjithsej 70% e të gjitha kërkesave të pranuara në platformë deri më tani janë nga këto vende. Nga vendet e tjera ka shtetas të Iranit, Gazës, Egjiptit, Pakistanit, Rusisë, Indisë, Nepalit, Sudanit, Uzbekistanit, Tunizisë etj. 81% e punëkërkuesve janë të moshës 18 deri në 50 vjeç, d.m.th. në moshë pune, gjysma e të cilëve janë nga 18 deri në 29 vjeç. Shumë prej tyre janë studentë që dëshirojnë të vazhdojnë shkollimin në Bullgari për të gjetur një punë pas diplomimit. Pak prej tyre janë emigrantë ekonomikë, shumica kanë deklaruar se kanë statusin e rezidentëve të përhershëm në Bullgari ose që kërkojnë mbrojtje."

„Pyetjet kryesore që u interesojnë punëdhënësve kanë të bëjnë me mënyrat për të punësuar emigrantët, nëse këta persona flasin bullgarisht, çfarë lloj përvoje profesionale kanë. Përndryshe, të paktën ata që na kanë kontaktuar duan të punësojnë të huaj dhe të përpiqen të tregojnë bashkëpunim. Por procesi për lidhjen e një kontrate është i gjatë, duhet të merren dokumente, certifikata mjekësore, si dhe një certifikatë mjekësore për pranim në restorante. Në këtë drejtim ndihmojnë shumë organizatat joqeveritare që luajnë rolin e ndërmjetësit. Përveç pengesës gjuhësore, problem i madh është edhe mungesa e strehimit të përhershëm dhe dhënia e kartës së identitetit dhe hapja e një llogarie bankare, e cila është edhe pengesë për punëdhënësit.“

Foto: Pixabay, Facebook /Foundation for Access to Rights - FAR

Përgatiti në shqip dhe publikoi: Kostandina Bello