Kryeministri i Republikës së Maqedonisë së Veriut, Hristijan Mickoski, tha se do të ndryshohen kuadrot në Komisionin e Përbashkët multidisiplinar midis Bullgarisë dhe Maqedonisë së Veriut për çështje historike dhe arsimore, njoftoi MIA. Sipas kryeministrit, komisioni aktual nuk i përmbush pritjet dhe “nuk është mbrojtës i interesave kombëtare të popullit maqedonas”. “Nuk ka asnjë kontekst politik. Është normale që qeveria e re, njerëzit e rinj që do të qeverisin me qeverinë e re, të bëjnë edhe ndryshime të kuadrove”, theksoi Mickoski.

Komisioni i përbashkët multidisiplinar midis Bullgarisë dhe Maqedonisë së Veriut për çështjet historike dhe arsimore u formua si rezultat i Marrëveshjes për Fqinjësi të Mirë ndërmjet Republikës së Maqedonisë së Veriut dhe Bullgarisë, nënshkruar më 1 gusht 2017. Qëllimi i tij është të zgjidhë çështjet e diskutueshme midis të dyja vendeve. Anëtarët e tij përfshijnë historianë dhe pedagogë nga të dy vendet.