Përfaqësuesit e përhershëm të BE-së në Bruksel vendosën njëzëri nisjen e negociatave të anëtarësimit me Shqipërinë. Fillimi do të jetë më 15 tetor me një konferencë ndërqeveritare BE-Shqipëri në Luksemburg. Më pas do të hapet grupi i parë i kapitujve të negociatave mbi "Çështjet Themelore". Shqipëria u nda kështu nga Maqedonia e Veriut në procesin e integrimit. Pengesa e fundit para nisjes së negociatave ishte një mosmarrëveshje mes Shqipërisë dhe Greqisë, për shkak të kryebashkiakut të arrestuar dhe të dënuar me origjinë greke Fredi Beleri në bashkinë shqiptare të Himarës. Më pas ai u zgjodh si eurodeputet në Greqi. Në fillim të shtatorit, autoritetet shqiptare e liruan me kusht, kujton BGNES. “Ky është një lajm i mirë për Shqipërinë, por është një hap prapa për Republikën e Maqedonisë së Veriut, e cila edhe një herë nuk arriti të ndërmarrë një hap vendimtar drejt anëtarësimit në BE”, thekson Euractiv.

Asambleja e Përgjithshme e OKB-së në Nju Jork u shndërrua në një fushë konfrontimi të ashpër për çështjen e Qipros. Në një fjalim, presidenti qipriot Nikos Hristodulidis i quajti pretendimet e presidentit turk Rexhep Erdogan për ekzistencën e dy shteteve të ndryshme në ishull "revizioniste" dhe "të paligjshme". Kështu ai iu përgjigj kërkesës së presidentit turk që bashkësia ndërkombëtare të njohë Republikën Turke të Qipros Veriore. Hristodulidis akuzoi Ankaranë për "shkelje të ligjit ndërkombëtar dhe Kartës së OKB-së" duke pushtuar një pjesë të vendit për 50 vjet. Ai i bëri thirrje direkt Erdoganit duke këmbëngulur për rifillimin e menjëhershëm të negociatave për çështjen e Qipros.

"Asnjë vend që beson në epërsinë morale të pozicionit të tij nuk refuzon të ulet në tryezën e bisedimeve," theksoi Hristodulidis.

SHBA-ja dhe Rumania nënshkruan një marrëveshje për një kredi prej 920 milionë dollarësh. Paratë janë për modernizimin e mbrojtjes rumune. Dokumenti u nënshkrua në Bukuresht nga ministri rumun i financave, Marsel Bolos dhe drejtori i Agjencisë së Sigurisë dhe Mbrojtjes së SHBA-së, Michael Miller. "Qasja e Rumanisë në fonde kaq të mëdha është një argument i fortë për besimin dhe për statusin e vendit tonë. Marrëveshja është vetëm faza e parë e projekteve të ardhshme të mbrojtjes që ne do të zhvillojmë së bashku me SHBA-në për të arritur një financim prej mbi 2 miliardë dollarësh”, tha kryeministri rumun Marcel Ciolacu. Ai njoftoi se paratë do të përdoren për përmirësimin e kapaciteteve mbrojtëse, zhvillimin e industrisë vendase të mbrojtjes, krijimin e vendeve të punës dhe futjen e teknologjive të reja, raporton BTA.

Ministria e Mbrojtjes e Kroacisë ka plotësuar të gjitha parakushtet për rikthimin e shërbimit të detyrueshëm ushtarak nga fillimi i vitit 2025. Duhet një vendim politik, i cili do të merret në parlament pas konsultimit me kryeministrin dhe presidentin, tha ministri i mbrojtjes Ivan Anusic. Instruktorët janë gati, janë përgatitur 3 vende për akomodimin vjetor të 17 000-18 000 rekrutëve mbi 18 vjeç, shtoi ministri, cituar nga HINA. Në përgjigje të pyetjeve gazetareske, ai tha se kostoja e stërvitjes fillestare ushtarake duhet të jetë më pak se 5 milionë euro në vit. Për ata që refuzuan të shkojnë, do të ketë një shërbim ushtarak civil alternativ, shtoi Anusic.

Sipas ligjit të ri për menaxhimin e mbeturinave nga 20 tetori, përdorimi i qeseve plastike të lehta me trashësi nga 15 deri në 50 mikron, si dhe i produkteve plastike njëpërdorimëshe, është i ndaluar në Mal të Zi, njoftoi qeveria malazeze. Ata që nuk respektojnë ligjin do të gjobiten nga 1000 deri në 40000 euro. Masa është pjesë e një përpjekjeje më të gjerë për të forcuar kontrollet dhe për të inkurajuar një zhvendosje drejt mënyrave më të qëndrueshme të menaxhimit të mbetjeve, me një fokus të veçantë në reduktimin e përdorimit të plastikës. Përveç ndalimit të qeseve plastike, ligji vendos edhe një tarifë për depozitimin e mbetjeve shtëpiake të përziera në vendgrumbullime, gjë që do të nxisë riciklimin dhe reduktimin e mbetjeve, raporton televizioni kombëtar RTCG.

Përpiloi: Ivo Ivanov

Foto: eurotopics.net, jutarnji.hr, euractiv.com, gov.ro, evarazdin.hr

Përgatiti në shqip dhe publikoi: Kostandina Bello