Ceremonia solemne ushtarake e marrjes së detyrës së Presidentit të ri të Bullgarisë Rumen Radev filloi para Monumentit të Ushtarit të Panjohur në Sofje. Ndër personat e pranishëm zyrtarë ishin Kryeministri në dorëheqje Bojko Borisov, Kryetarja e Parlamentit Cecka Caçeva, liderët partiakë, magjistratët e lartë dhe ushtarakët, përfaqësuesit e korpusit diplomatikë. Kreu i Shtetit Rosen Plevneliev, mandati i të cilit po skadon, dhe trashëgimtari i tij Rumen Radev u përkulën njëri pas tjetrit para flamurit kombëtar dhe e përshëndetën rojën e nderit. Në fjalimin zyrtar Presidenti Plevneliev deklaroi se ka përfunduar një mandat të vështirë por të suksesshëm, në të cilin ka ecur në drejtimin e drejtë dhe i ka zbatuar të gjitha prioritetet pa pasur gabime strategjike. Duke iu drejtuar trashëgimtarit të vet ai tha se Presidenti i ri gjithashtu do të ketë një mandat shumë të vështirë dhe i uroi për të respektuar superioritetin e ligjit dhe barazinë për të gjithë. Presidenti Radev siguroi se do të bashkëpunojë me Parlamentin bullgar, institucionet kombëtare dhe shtetasit për gjetjen e vendimeve më të mira për Bullgarinë, kurse me partnerët e huaj – për forcimin e unitetit të Evropës. Do të punojë për dinjitetin e popullit bullgar dhe për krijimin e një shoqërie më të drejtë, të mbështetur te ligji dhe morali, shoqëri kjo e cila të mos varet as nga e kaluara, as nga e ardhmja, vuri në dukje gjithashtu ai. Me 21 përshëndetje artilerie u shënua ndërrimi i Kryekomandantit Suprem të Forcave të Armatosura. Sipas Kushtetutës ky post gjithashtu kryesohet nga Kreu i Shtetit.