Presidenca Bullgare e Këshillit të BE-së midis pritjeve të larta dhe ... protestave

Foto: BGNES

Me një ceremoni solemne në Sofje sot fillon zyrtarisht Presidenca e parë Bullgare e Këshillit të Bashkimit Evropian. Dhjetë vjet pas aderimit tonë në BE Bullgaria e merr përsipër përgjegjësinë për ta koordinuar veprimtarinë e organeve dhe të institucioneve kryesore të një organizate pa analog, së cilës 28 shtete evropiane i kanë dhënë të drejta të mëdha në politikën ndërkombëtare, siguri dhe ekonomi.

Me rastin e fillimit të Presidencës në Sofje mbërriti elita politike e Evropës – Kryetari i Këshillit Evropian Donald Tusk, Kryetari i Parlamentit Evropian Antonio Tajani, Kryetari i Komisionit EvropianJean-Claude Juncker, të gjithë komisionarët evropianë. Të nesërmen Presidenca do të hyjë menjëherë në fazën e punës duke filluar bisedime midis anëtarëve të KE-së dhe ministrave bullgarë mbi prioritetet kryesore për muajit në vijim. Temat e rendit të ditës janë shumë dhe me rëndësi të madhe – Brexit, buxheti i BE-së për periudhën e re programore, ndryshimet në politikën e migracionit, integrimi evropian i Ballkanit Perëndimor... Kryesia Bullgare është ngarkuar suplementarisht me pritje të larta – për përparimin në fazën kritike të bisedimeve për Brexit-in; për shpërndarjen e drejtë të peshave buxhetore lidhur me daljen e Britanisë së Madhe nga BE-ja;për ruajtjen e interesave në politikën e kohezionit; për përparimin e integrimit evropian të vendeve fqinje të Bullgarisë – Shqipëria, Bosnja e Hercegovina, Kosova, Maqedonia, Serbia dhe Mali i Zi; për normalizimin e dialogut mes BE-së dhe Turqisë etj.

Gjatë paraqitjes paraprake të prioriteteve të saj Bullgaria mori sigurimin e partnerëve të saj evropianë për solidaritet. Si një gjest simpatie dje Ambasadorja e Britanisë së Madhe në Sofje Emma Hopkins komentoi se “bullgarët janë njerëz shumë pragmatikë, sidomos kur të bëhet fjalë për Evropën. Ata komunikojnë shumë lehtë dhe ... arrijnë lehtë deri në bisedimin, ku lindin vendimet e domosdoshme.”

Udhëheqja Bullgare është e qartë për përgjegjësitë e saj, autoritetet bullgare janë mobilizuar maksimalisht për t’i përballuar detyrat. Ata e kanë përkrahjen jo vetëm të forcave politike në pushtet, por edhe të opozitës. Madje oponenti më i ashpër i pushtetarëve – Partia Socialiste Bullgare, deklaroi se do të bashkëpunojë për suksesin e Presidencës Bullgare, sepse bëhet fjalë për një temë mbipartiake dhe kombëtare. Shoqëria në përgjithësi gjithashtu e përkrah Presidencën Bullgare. Në 93 bashki të vendit do të zhvillohen ngjarje të ndryshme kushtuar Kryesisë. Sot në Teatrin Popullor “Ivan Vazov” në Sofje ka një spektakël festiv, në të cilin Kori i Fëmijëve pranë Radios Kombëtare Bullgare do të interpretojë himnin e BE-së – Simfonia e nëntë e Ludwig van Beethovenit, kurse pas kësaj elita evropiane do të marrë përshëndetje me interpretime të ansambleve prestigjioze “Joan Kukzel – Zëëmbli”, “Çinari” dhe “Bëllgare”

Mirëpo, Presidenca filloi me protesta, të cilat megjithëse nuk janë kundër saj, lënë një përshtypje negative. Në kuadrin e një dite do të ketë protestë para Parlamentit në përkrahje të ratifikimit të Konventës së Stambollit, organizuar nga shoqata “Alianc për mbrojtjen kundër dhunës në bazë të seksit”; “Forumi Social i Sofjes” do të ngulë këmbë për të drejtat e pensionistëve; në udhëkryqet e Sofjes, përmes të cilave do të kalojnë mysafirët tanë nga Evropa, sindikatat policore do të kërkojnë rritje të pagave; priten mitingje të qytetarëve “pro” dhe “kundër” ndërtimit të pajisjeve sportive në Parkun Kombëtar “Pirin”. Do të ketë demonstrime edhe të përfaqësuesve të iniciativës për “Sovranitetin e Bullgarisë dhe të shteteve në botë”, ku në shfaqjet e saj të fundit u valëvit flamuri rus. Policia është shqetësuar për faktin se këto aktivitete do ta vështirësojnë trafikun në Sofje më shumë sesa masat e pashmangshme të sigurisë. Në qoftë se kemi parasysh reaksionet e mediave, qëndrimi ndaj protestave është më tepër negativ. Gazeta “Monitor” informon për masat suplementare me titullin “E fillojmë Presidencën me 9 protesta”. Gazeta “Standard” shënon se siç duket një pjesë e bullgarëve e konsiderojnë Presidencën Bullgare të Këshillit të BE-së si një mundësi për ankime. Në numrin e sotëm e përditshmja “24 çasa” publikoi titullin “Kudo protesta me rastin e hapjes së Presidencës në Sofje”

Në vetë fillimin Presidenca Bullgare gjendet njëkohësisht para pritjeve të mëdha dhe protestave. Mirëpo, më të rëndësishme do të jenë reaksionet pas gjashtë muajsh, kur do të dihen rezultatet e saj.

Përgatiti në shqip: Vesella Mançeva

Më shumë nga rubrika

Çavdar Çotov – mjeshtri i biçikletave të personalizuara

A e mbani mend historinë për Princin e Vogël, i cili mësoi nga dhelpra ç’do të thotë të lidhesh me dikë. “Për mua ti aktualisht je vetëm një djalë, i cili u ngjan qindra djemve të tjerë. Dhe unë nuk kam nevojë për ty. Dhe ti nuk ke nevojë për mua...

botuar më 18-10-16 3.44.MD

Ngjarje me adresë ballkanike

Maqedonia fillon bisedime me NATO-n Bisedimet për aderimin e Maqedonisë me NATO-n do të fillojnë më 18 dhe 19 nëntor në selinë e Paktit në Bruksel, bëri të ditur zëdhënësi i qeverisë në Shkup. Mile Boshnjakovski. Ai deklaroi se Maqedonia..

botuar më 18-10-15 3.33.MD

Si mund të bëhesh mbret i historisë?

A kujtoheni vallë se cila ka qenë ora juaj e dashur e mësimit, kur qetë nxënës? Për mua këto qenë orët e letërsisë dhe deri diku të historisë. Deri diku sepse një pjesë e madhe nga informacioni, të cilin e dimë e mësojmë me detyrim, jo sepse duam..

botuar më 18-10-14 1.10.MD