Mungon baza ligjore për ekstradimin në Shtetet e Bashkuara të Amerikës të personit Zheljaz Andreev dhe katër kolegëve të tij. Kjo pozitë është deklaruar shprehimisht para palës amerikane – tha Prokurori i Përgjithshëm Sotir Cacarov pas takimit të tij me Kryeministrin Bojko Borisov, në të cilin morën pjesë Ambasadori i SHBA-së Erik Rubin dhe Ministrja e drejtësisë Cecka Caçeva.

Përfaqësia e “Interpol”-it në Uashington kërkoi ndalimin e Zheljaz Andreevit dhe katër kolegëve të tij që kanë punuar në zyrën e kompanisë amerikane “Arotronics” në Sofje. Sipas palës amerikane bullgarët në cilësinë e nëpunësve të kompanisë kanë shkelur embargon amerikane kundër Sirisë, sepse zyra e tyre ka organizuar furnizimin e pjesëve të riparimit për aeroplanë të aviacionit civil, të përdorura nga linjat ajrore siriane. Pritet se çështja do të diskutohet me Prokurorin e Përgjithshëm të SHBA-së, i cili do të marrë pjesë në fundin e majit në Samitin BE-SHBA.