Sipas analizës së Dhomës ekonomike bullgare për tregtinë e jashtme gjatë vitit 2017, të bërë në bazë të të dhënave të ofruara nga Qendra ndërkombëtare tregtare në Gjenevë (të mbledhura në 233 shtete) gjatë viteve të fundit eksporti bullgar i mallrave është me vlerë më të lartë të shtuar dhe ajo vazhdimisht është duke u rritur. Kjo kategori e mallrave tashmë përbën një e katërta e tërë eksportit bullgar dhe në të nuk hyn shitja e armëve.

Gjatë vitit të kaluar Bullgaria u ngjit një vend më lartë dhe tani është në vend të 61-të ndër eksportuesit botërorë. Vlera e eksportit të saj është 30.2 mlrd. dollarë – pjesën më të madhe prej tij e përbëjnë elektroteknika dhe elektronika (pothuaj 3 mlrd. dollarë), bakri dhe produktet e bakrit (mbi 2.7 mlrd. dollarë), makinat dhe aparatet (2.4 mlrd. dollarë).

Gjatë pesë viteve të fundit eksporti i elektronikës dhe elektroteknikës shënon rritje mesatare vjetore 5%, derisa në të njëjtën kohë importi botëror i produkteve të këtij lloji është rritur 1%. Sipas Dhomës ekonomike bullgare kjo do të thotë se produktet bullgare në këtë sektor janë me cilësi të lartë, janë të parapëlqyera dhe e zënë vendin e furnizuesve të tjerë. Eksporti i makinave dhe aparateve gjithashtu shënon rritje 2%, derisa importi botëror mbetet në të njëjtin nivel. Sipas mendimit të ekspertëve eksporti i prodhimit special (ushtarak) është për 1.15 mlrd dollarë dhe po ta shtojmë atë tek 30.3 miliardët e përmendur, Bullgaria renditet bashkë me Greqinë në listën e eksportuesve botërorë.

Mallrat, me të cilat shteti ynë zë një vend prijës në eksportin botëror tregojnë njëfarë qëndrueshmërie. Në të njëjtën kohë eksporti i Bullgarisë ka një problem serioz dhe ai është diversifikimi i tregjeve. 4800 janë mallrat e eksportuara nga Bullgaria. 570 prej tyre eksportohen në vetëm një shtet. Për shembull xeheroret dhe koncentratet e metaleve të çmuara eksportohen kryesisht për në Gjermani. Bakri anodik i prodhuar tek ne shitet në Gjermani dhe Belgjikë, kabllot për automjete  - në Turqi, tubet e çelikut për gaz – në Rusi.

Bullgaria eksporton mallra në 199 shtete. Tregjet më të rëndësishme për ekonominë tonë janë Gjermania, Italia, Rumania, Turqia, Greqia – atje shkon 44% prej eksportit. Pastaj me 16.4% prej tij renditen Belgjika, Franca, Spanja, Rusia dhe Holanda. Sipas analizatorëve të Dhomës ekonomike bullgare shteti ynë mund ta shtojë eksportin për në shtetet e zhvilluara, në se bëhet nënkontraktues i firmave të mëdha dhe po të përfshihet kështu në rrjetet globale të furnizimeve. Në fakt konkurrueshmëria më e madhe e eksportit bullgar është kryesisht në sajë të kompanive ndërkombëtare, të cilat punojnë në territorin bullgar, kurse më e ulët është pjesa e firmave vendase, konkludojnë analizatorët e Dhomës Ekonomike Bullgare.

Përpiloi: Stoimen Pavllov

Përgatiti në shqip: Jordanka Ivanova