Sofja për herë të tretë është mikpritëse e forumit rinor ndërkombëtar për OKB dhe BE

botuar më 10-07-23 11.31.PD

Nga 24 deri më 31 korrik Sofja për herë të tretë do të jetë mikpritëse e konferencës rinore ndërkombëtare për OKB dhe BE “Modeli ndërkombëtar i kombeve të bashkuara i Sofjes – SOFIMUN”. Ndër temat që do të diskutojnë të rinjtë në vazhdim të një jave në Pallatin Kombëtar të Kulturës në Sofje janë strategjia “Evropa 2020”, aderimi i Turqisë në BE, kriza financiare botërore, dhuna mbi gazetarët dhe mbrojtësit e të drejtave të njeriut, ndryshimet klimatike etj. Diskutimet do të zhvillohen në formën e simulimit të konferencave të OKB-së dhe BE-së. Forumi sponsorizohet nga fondacioni “Fridrih Ebert”, ambasada e SHBA-së në Bullgari, Ministria e Drejtësisë dhe Ministria e Kulturës, Pallati Kombëtar i Kulturës, Bashkia e Kryeqytetit, përfaqësitë e KE-së dhe PE-së në Sofje, Komisariati suprem për refugjatët i OKB-së. Radioja Kombëtare Bullgare është partnere e forumit.

Konferenca SOFIMUN do të pretë afro 200 studentë nga 40 vende nga tërë bota. Ndër ta do të ketë dhe 40 bullgarë. Delegatët do të marrin pjesë në 7 komitete të sistemeve të dy organizatave botërore. Katër prej tyre janë të OKB-së – Komiteti i sigurisë, i të drejtave të njeriut, i zhvillimit të qëndrueshëm, i drejtësisë ndërkombëtare; dy të BE-së – Këshilli i ministrave të jashtëm dhe Parlamenti Evropian; dhe një është një qendër shtypi e krijuar posaçërisht, ku studentët mund të punojnë si gazetarë nga 13 media botërore, ndër të cilat Euronews, EU Observer, Economist etj. Delegatët në forumin rinor zgjidhen me konkurs. Gjatë debateve ata do të përfaqësojnë jo vendin e tyre, por një vend tjetër me fjalime, propozime dhe pozita mbi temat e caktuara. Formati është i dobishëm për të rinjtë, të cilët përfitojnë një përvojë politike dhe diplomatike. Për shembull në një forum të ngjashëm ka marrë pjesë sekretari i përgjithshëm i tanishëm i OKB-së Ban Ki Mun.

“Më 24 korrik do ta hapim konferencën me një ceremoni zyrtare në Pallatin Kombëtar të Kulturës – tha Paola Ivanova, presidente e fondacionit SOFIMUN, i cili e organizon forumin. – Më 25 korrik do t’i njohim pjesëmarrësit e huaj me historinë dhe kulturën e Bullgarisë – ata do të shohin valle popullore dhe do të vizitojnë Muzeun Historik Kombëtar. Pastaj do të zhvillohet një karnaval i kombeve, në të cilin të gjithë pjesëmarrësit do të prezantojnë vendet e tyre me muzikë, valle, kostume, gjella. Ditën e hënë fillojnë sesionet, në të cilat delegatët do të hyjnë në rolin e diplomatëve të vërtetë, duke përfaqësuar vende të ndryshme anëtare të BE-së ose OKB-së dhe duke debatuar mbi ngjarjet aktuale nëpër botë” – tregoi zonja Ivanova. Ajo shpjegoi se organizatorët kanë zgjedhur tema të ndërlikuara, si për shembull aderimi i Turqisë në BE. Delegatët juristë të ardhshëm do të përpiqen të sqarojnë anën juridike të dukurive si Muri i Berlinit për shembull.

“Kur njerëzit marrin pjesë në konferenca të tilla, ata e pranojnë debatin si një garë. Duke përfaqësuar një shtet të huaj, me pozitën e të cilit pjesëmarrësi nuk është dakord, ai mund të bëjë një kthesë për ta bërë debatin më interesant. Më e rëndësishmja është jo të ndjekësh saktësisht pozitën e shtetit, kurse të mësosh si të punosh me mjetet diplomatike, të mendosh shpejt dhe të jesh adekuat” – tha në përfundim Paola Ivanova.

Përgatiti në shqip: Ekaterina Tarpomanova

По публикацията работи: Tatjana Obretenova

Последвайте ни и в Google News Showcase, за да научите най-важното от деня!

Ndaje

Sofja për herë të tretë është mikpritëse e forumit rinor ndërkombëtar për OKB dhe BE

Më shumë nga rubrika

Si do të ndikojë zgjedhja e Donald Trump në Evropë dhe në siguri, në mbrojtje dhe ekonomi?

Programi arsimor "Tregimet e pathëna të bullgarëve" me mbështetje të madhe brenda dhe jashtë vendit

Për herë të parë që nga viti 1985, në vendin tonë ka një rënie pothuajse zero të popullsisë

Tirana njoftoi të dhëna zyrtare të përditësuara për bullgarët në Shqipëri

Një pemë e bukur bullgare e Krishtlindjeve shkëlqen sërish në Muzeun e Industrisë në Çikago