Sasha Popov është njëri nga dirigjentët më të shquar bullgarë. Që nga koha e fëmijërisë ai i bie violinës dhe pas kësaj është bërë muzikant i dhomës. Sasha Popovin e quajnë “babai i simfonizmit bullgar”. Në muajin korrik mbushen 115 vjet nga lindja e tij.

Sasha Popov ka lindur në vitin 1899 në qytetin Ruse. Violinë ka mësuar në Sofje te Petko Naumov – violinist, dirigjent dhe kompozitor. Pas kësaj muzikanti i ri ka shkuar në Vjenë ku ka vazhduar të mësonte violinë te prof. Karl Pirl dhe te pedagogu Otokar Shevçik. Deri në moshën 19 vjeçare Sasha Popov ka studiuar në Konservatorin e Vjenës dhe më pas është rikthyer në Bullgari ku është thirrur në ushtri. Pas shërbimit ushtarak muzikanti i ri ka filluar mësimdhënie në Akademinë e Muzikës në Sofje ku ka themeluar një orkestre simfonike me të cilën ka dhënë koncert pas koncerti.

Edhe sot e kësaj dite për Sasho Popovin rrëfehen histori të ndryshme. Bashkëkohësit e tij e përshkruajnë si personalitet shumë magnetik, profesionalist i cili nuk bën kompromise dhe njeri i dhembshur. Orkestra e tij ka dhënë premiere të veprave të Panço Vlladigerovit, Ljubomir Pipkovit, Martin Goleminovit dhe të kompozitorëve të tjerë të njohur. Sasha Popov ka ftuar mysafirë dirigjentë nga elita e botës – Bruno Valter, Karlo Ceki etj. Në vitin 1956 muzikanti bullgar është pensionuar papritur. I pa punë Sasha ka themeluar orkestrën e dhomës “Kolegjium muzikum” ku interpretuesit kanë punuar falas. Në këtë periudhë ai ka dirigjuar koncertet e Orkestrës Simfonike të Radios Kombëtare Bullgare.

“Kam interpretuar vepra të Respigit në periudhën nga 1936-a deri në vitin 1939. Atëherë këto vepra u dëgjuan për herë të parë në Bullgari, ka thënë dikur Sasha Popov. – “Pishat romake” është një pjesë pas së cilës orkestra e radios u dashurua. Jam i lumture se me muzikantët e radios pata shumë përparësi. Për mua takimi me orkestrën simfonike të radios gjithmonë ka qenë kënaqësi shumë e madhe.

Përgatiti në shqip: Anna Kapitanova

Fotografitë janë nga arkivi i familjes