Kryeqyteti bullgar Sofja ishte mikpritës i një mbledhjeje joformale të ministrave të energjetikës nga Bashkimi Evropian. Ajo u zhvillua në kuadrin e Presidencës Bullgare të Këshillit të BE-së dhe kaloi nën moton “Energji e pastër për të gjithë evropianët”. Në kuadrin e forumit u shqyrtua pakoja e rëndësishme e dosjeve kushtuar energjisë së pastër, e cila përfshin direktivat për efikasitetin energjetik dhe burimet ripërtëritëse energjetike.

Eurokomisionari për klimën dhe energjetikën Migel Arias Kanete deklaroi se pas disa vitesh energjia e prodhuar nga burimet ripërtëritëse energjetike do të jetë e konkurrueshme në treg dhe kjo do ta bëjë energjinë elektrike më efektive. Ai shtoi se ka nevojë për rregulla më të rrepta të lidhura me emisionet e karbonit, që lëshohen nga centralet e qymyrit. Ata do të mbeten pa subvencion shtetëror në qoftë se emisionet e tyre të karbonit tejkalojnë 250 gramë për kilovatë orë. Energjia bërthamore është një resurs, i cili mund të përdoret pa problem nga shtetet-anëtare, por duhet të garantohet siguria e qytetarëve dhe vendet duhet të zbatojnë strikt detyrat e tyre të direktivës lidhur me ruajtjen dhe asgjësimin e mbeturinave bërthamore, deklaroi komisionari evropian.

Pritet që gjatë muajit nëntor të paraqitet strategjia evropiane për dekarbonizimin në Bashkim deri në vitin 2050.

Sa u përket sfidave, me të cilat ndeshet Ballkani Perëndimor në rrugën drejt një tregu liberal dhe të diversifikuar energjetik, eurokomisionari Kanete është i mendimit se:

”Shtylla më e rëndësishme e bashkëpunimit tonë duhet të jetë korniza juridike dhe institucionale, e cila do të arrihet vetëm me vazhdimin e afrimit midis legjislacionit të Ballkanit Perëndimor dhe legjislacionit energjetik. Këto qëllime nuk mund të arrihen, pa pasur parasysh tranzicionin energjetik në nivel kombëtar dhe regjional. Që të vëzhgohet përparim sa i përket bashkimit energjetik, ka nevojë për krijimin e strukturave të forta udhëheqëse. Me ndihmën e tyre do të ecim drejt një sistemi më të sigurt dhe të qëndrueshëm evropian.”

Gjatë debatit në Sofje ministrat shqyrtuan se çfarë të jetë roli këtej e tutje i Agjencisë për bashkëpunim mes rregullatorëve energjetikë. Vendimi nëse ajo të ruajë kompetencat e veta apo të marrë kompetenca të reja, duhet të merret deri në fund të qershorit.

Përgatiti në shqip: Vesella Mançeva