Kryeministrat e Bullgarisë, Izraelit, Hungarisë, Rumanisë, Italisë, kancelari i Austrisë dhe Presidenti i Qipros zhvilluan një videokonferencë mbi temën e koronavirusit.

Kryeministri bullgar Bojko Borisov tha se gjëja më e rëndësishme tani është solidariteti. Ai nënvizoi kërcënimin e stërmadh që vjen nga kriza e refugjatëve dhe nga qindra njerëzit, të cilët vijnë nga vende të ndryshme pa iu nënshtruar kontrolleve.

Prandaj kërkoi nga Bashkimi Evropian dhe nga shtetet e tjera anëtare të propozojnë masa serioze për përballimin e krizës së emigrantëve. “Me rëndësi është që bota të gjejë zgjidhje, sepse jam i bindur se kriza ekonomike dhe financiare po troket në derën tonë”, paralajmëroi Borisovi.