Mbi 80 turistë nga Britania e Madhe, të cilët kanë mbërritur në Sofje nga vendpushimi Bansko më 17 mars, pasi atje ishte shpallur karantinë, mbeten të bllokuar në dy hotele të kryeqytetit. Pritet se të mërkurën (18 mars) deri në orën 12 të kohës lokale bullgare, ata do të ikin për në Britaninë e Madhe me fluturim çarter të siguruar nga kompania, e cila ka organizuar udhëtimin e tyre.

47 bullgarë ishin bllokuar në Marok për shkak të masave parandaluese të autoriteteve vendase. Dje turistët arritën të iknin nga Kazablanka për në Stamboll. Nga Stambolli atyre do t’u sigurohet transport me autobus deri në kufirin bullgar, kurse Konsullata bullgare në Edrene do të ndihmojë kalimin e pikës së kontrollit kufitar.

Nga Amani i Jordanisë për në Bukuresht janë transportuar me avion 116 turistë evropianë, ndër të cilët ka dhe 6 bullgarë. Ambasada jonë siguroi leje për këtë nga Mbreti i Jordanisë Abdullah II pas mbylljes së hapësirës ajrore të Jordanisë për fluturime.