Parlamenti turk feston 100 vjet nga themelimi i vet

Në Ditën e Sovranitetit Kombëtar – 23 prill, Parlamenti në Turqi shënon përvjetorin e 100 të themelimit të vet. Për shkak të pandemisë së Covid-19 organi legjislativ shtyu një sërë ngjarjesh të lidhura me përvjetorin e tij. Festat janë përqendruar te fëmijët, sepse Kryetari i parë i Parlamentit Kemal Atatürk, ua ka kushtuar Ditën e Sovranitetit pikërisht fëmijëve, si e ardhmja e kombit. Kuvendi i Madh Kombëtar ka pasur seancë për herë të parë në vitin 1920 në Ankara gjatë luftës për pavarësi, që të vendosen themelet e republikës së pavarur, mondane dhe moderne.

Vikari i Patrikut serb është i sëmurë nga koronavirusi

Agjencia shtetërore Tanjug bëri të ditur se Peshkopi Stefan, i cili është Vikari i Patrikut të Kishës Ortodokse Serbe, është i infektuar me koronavirus. Vetë Patriku Irinej është testuar për Covid-19 dhe ka rezultuar negativ. Ditën e diel Ministri i Shëndetësisë Zlatibor Lončar bëri të ditur se viktimat e virusit në Serbi janë 134. Nga gjithsej 7114 të infektuar, 1025 janë shëruar.

U hoq ndalesa më e vazhdueshme për lëvizje në Maqedoninë e Veriut

Ditën e diel në mëngjes në Maqedoninë e Veriut u hoq ndalesa më e vazhdueshme deri tani për lëvizje në territorin e vendit, e cila vazhdoi 85 orë pas shpalljes së saj të premten pasdreke. Ora policore vazhdon të jetë në fuqi nga ora 16.00 deri në orën 05.00 të nesërmen. Gjatë këtij intervali kohor mund të lëvizin vetëm qytetarë, të cilët kanë angazhime pune dhe disponojnë autorizimin e domosdoshëm. Kryeministri Oliver Spasovski shpalli se është duke punuar mbi një plan për lehtësimin gradual të masave kufizuese që nga 1 maji.

Greqia transporton migrantët nga ishujt

Rreth 1500 migrantë në kampin “Moria” në ishullin Lesbos do të transportohen këto ditë në pjesën kontinentale të Greqisë. Transferimi i tyre është pjesë e planeve të autoriteteve greke për pakësimin e tensionit në qendrat e mbushura me imigrantë në Ishujt e Egjeut Lindor. Në kuadrin e dy javëve numri i të transportuarve do të arrijë afro 2400 veta. Nga dega greke e Organizatës Ndërkombëtare të Migracionit komentuan se në sfondin e pandemisë së koronavirusit pakësimi i numrit të migrantëve në ishuj është “më urgjent se kurrë”.

BE-ja i dhuroi Shqipërisë 20 000 teste për Covid-19

BE-ja i ka dhuruar Shqipërisë 20 000 teste për Covid-19. Këtë e deklaroi i dërguari i Brukselit në Tiranë Luigi Soreca. Sipas të dhënave të Institutit të Shëndetit Publik në Shqipëri në fund të javës së kaluar në vend ka pasur 609 të infektuar me Covid-19, 345 prej të cilëve janë shëruar, ndërsa 26 të tjerë kanë vdekur.

Përpiloi: Stoimen Pavllov

Përgatiti në shqip: Vesella Mançeva