Radioja Kombëtare Bullgare © 2021 Të gjitha të drejtat janë të rezervuara

7 muze të pazakontë që duhet të vizitoni

Foto: Facebook/ podvodnicaslava

Nëse jeni kureshtarë dhe dëshironi të njihni Bullgarinë jashtë klisheve të zakonshme turistike, ju rekomandojmë të vizitoni muzetë e mëposhtëm, të cilat do t'ju befasojnë dhe do të pasurojnë idetë tuaja rreth traditave bullgare dhe trashëgimisë sonë kulturore.

Muzeu i Kosit në fshatin Studen Izvor


Kosi bullgar, fama e të cilit është përhapur në të gjithë botën, këndohet në një muze unik që gjendet në një shtëpi më shumë se 200-vjeçare në fshatin e lindjes të Dr. Stamen Grigorov, i cili në vitin 1905 përshkroi për herë të parë Lactobacillus bulgaricus - bakterin që shkakton formimin e produktit të shëndetshëm dhe me pak kalori të qumështit.

Muzeu i Gomarit në fshatin Gurkovo

Ideja për krijimin e tij është lidhur me zhvillimin e një rali me karroca gomari të pikturuara bukur. Vizitorët mund të shohin ekspozita autentike që kanë të bëjnë me gomarin, i cili ka qenë një ndihmës i madh në punën bujqësore të paraardhësve tanë. Atraksioni kryesor në muze është një gomar i balsamuar që përshëndet mysafirët në hyrje.

Apartamenti i Kuq në Sofje 

Mirësevini në kohën e socializmit të vonë në vitet '80 të shekullit të njëzetë! Në qendër të Sofjes do të gjendeni në një botë tjetër. Apartamenti-muze rikrijon shtëpinë tipike të banuar nga familja e dikurshme mesatare bullgare. Gjithçka këtu është paraqitur deri në detajet më të vogla - nga televizori i vjetër, mbulesat e tavolinave prej druri, e gjer te telefoni dhe mobiliet. Muzeu është një hit mes turistëve të huaj.

Muzeu i Pliocenit pranë fshatit Dorkovo 

Ndërtesa e muzeut nga jashtë është projektuar si një koshere e lashtë bletësh. Brenda do të takoheni ballë për ballë me një mastodont mbresëlënës në madhësi reale, i cili duket si i gjallë. Vizitorët mund të teleportohen 5 milion vjet më parë në Pliocenin e vonë. Mbeturinat e gjetura në varrezat prehistorike afër Dorkovos datojnë që nga ajo kohë. Muzeu gjithashtu paraqet eshtra smilodonësh, rinoqerontë parahistorikë dhe specie të tjera interesante të zhdukura prej shumë kohësh.

Muzeu i Minierave në qytetin e Pernikut


Ai është pjesë e një galerie nëntokësore me një gjatësi prej 630 metra, ku midis viteve 1891 dhe 1966 është nxjerrë qymyr.Vizitorët vendosin helmeta sigurie dhe depërtojnë në minierën e vjetër.Këtu janë paraqitur lloje të ndryshme të lokomotivave dhe të vagonëve të tjerë, mjete dhe pajisje autentike të minatorëve, telefona minierash, etj. Pranë hyrjes së muzeut ruhet një pemë e ngurtësuar që është mbi 50 milion vjeçare.Quhet "pema e lumturisë".Dikur, duke hyrë në minierë, minatorët e kanë prekur atë për fat.

Muzeu i Verës pranë qytetit të Plevenit


Vera është nderuar në trojet tona që nga koha e trakëve.Kjo është arsyeja se pse njerëzit në Pleven i kanë kushtuar asaj një muze të veçantë, veçanërisht pasi qyteti është shtëpia e Institutit të Vreshtarisë dhe Enologjisë. Në shpellën e freskët në Parkun Kajllëka gjendet një bodrum komod ku mund të shijoni varietete të ndryshme të verës vendase.Dhe jo vetëm.Enoteka e muzeut ruan verëra të moshës nga 30 deri në 90 vjeç.Koleksioni përmban gjithashtu 6000 shishe me verëra më të reja nga i gjithë vendi.

Nëndetësja-Muze në qytetin Bellosllav


"Lavdi" - ky është emri i nëndetëses së fundit bullgare, e kthyer në një eksponat muzeor. Është prodhuar në vitin1959 në Bashkimin Sovjetik. I është dorëzuar Marinës Bullgare në vitin 1985 dhe ka lundruar deri në fund të vitit 2010. Me të ekuipazhet kanë kryer stërvitje luftarake dhe kanë marrë pjesë në stërvitje ndërkombëtare. Përveç kabinave të oficerëve dhe postës komanduese, vizitorët mund të shohin një tryezë kirurgjikale me instrumente për kryerjen e operacioneve. Nëndetësja është e gjatë mbi 76 metra dhe e gjerë gati 7 metra. Ajo është e vendosur në afërsi të një vendi tjetër jo standard në qytet - Muzeu i Qelqit.

Përgatiti në shqip: Vesella Mançeva

Foto: bulgariatravel.org, arkiv, redflatsofia.com, museumpernik.com, Facebook/ Wine museum in the Town of Pleven, Facebook/ podvodnicaslava


Më shumë nga rubrika

Në Aeroportin e Sofjes do të hapet një laborator Covid për udhëtarët

Pas disa ditësh në Terminalin 2 në Aeroportin e Sofjes do të hapë dyer një laborator i specializuar Covid. Të gjithë kalimtarët do të mund të bëjnë test PCR, test të shpejtë të antigjenit dhe teste të tjera. Testi PCR do të jetë gati brenda 2..

botuar më 21-07-30 2.38.MD

Turizmi aventuresk pritet që të rikuperohet më shpejt

Deri më 4 vjet më shpejt nga e pritura do të rivendoset industria e turizmit aventuresk në krahasim me atë masiv. Kjo prognozë është e regjistruar në një raport të Organizatës Botërore për Turizmin Aventuresk. Turizmi aventuresk është i lidhur..

botuar më 21-07-25 11.45.PD

Bukuritë e qiellit të natës afër Krapec

Mihaill Minkov është një astro-fotograf dhe dizajner grafik që eksploron misteret e qiellit të natës nëpërmjet foto-objektivit. Ekipi i programit "Izotopia" të BNR-së e sfidoi atë të filmonte July Morning /një traditë në Bullgari e pritjes së..

botuar më 21-07-24 2.35.MD