Programi i ditës
Radioja Kombëtare Bullgare © 2022 Të gjitha të drejtat janë të rezervuara

Kryetarja e Komisionit për Politikat për Bullgarët Jashtë Shtetit Antoaneta Coneva para Radio Bullgarisë:

Eliminimi i korrupsionit në institucione është një nga kushtet për kthimin e emigrantëve në vendin tonë

Foto: arkiv

Politikat shtetërore ndaj bullgarëve jashtë vendit janë në fokus të një komisioni të posaçëm parlamentar. Në Legjislaturën e 47-të Kuvendit Popullor ai drejtohet nga Antoaneta Coneva. Deputetja nga Koalicioni “Bullgaria Demokratike” është bashkëthemeluese e një organizate joqeveritare me përvojë të gjerë në monitorimin e procesit zgjedhor në Bullgari dhe në seksionet bullgare jashtë vendit. Një nga qëllimet e saj, si kryetare e Komisionit për Politikat për Bullgarët Jashtë Shtetit, është t'i lejojë qytetarët bullgarë të ushtrojnë lirisht të drejtën e tyre për të votuar, pavarësisht se ku ndodhen në botë.

Në një intervistë speciale për Radio Bullgarinë Antoaneta Coneva iu përgjigj pyetjeve të rëndësishme - a do të ndryshojë Ligji për bullgarët jashtë vendit, si të optimizohet puna e Agjencisë për Bullgarët Jashtë Shtetit, kur praktikisht shërbimet elektronike do të mund të përdoren nga bashkatdhetarët tanë jashtë vendit…

Digjitalizimi i shërbimeve të ofruara nga misionet tona konsullore dhe diplomatike është një çështje kyçe për të cilën tashmë po punohet së bashku me Ministrinë e Qeverisjes Elektronike dhe Ministrinë e Punëve të Jashtme. Tani për tani, bullgarët jashtë vendit mund të përdorin online vetëm nënshkrimin elektronik kur dorëzojnë dokumente për lëshimin e kartës së identitetit, si dhe të dërgojnë një kërkesë elektronike për ndonjë takim në disa nga konsullatat tona. Se cilat shërbime të reja do të shtohen, do të bëhet e qartë brenda disa ditësh, tha Antoaneta Coneva:

“Bëhet fjalë për ato shërbime që do të përdoren më shpesh nga qytetarët bullgarë jashtë vendit, në mënyrë që të mos duhet të kapni aeroplanin dhe të ktheheni në Bullgari për të marrë shërbimin e dëshiruar më lehtë dhe më shpejt”, shpjegoi Coneva.

Deri në fund të shkurtit do të jetë gati vlerësimi i ndikimit të ligjit për bullgarët jashtë vendit, me të cilin është ngarkuar Qendra Kombëtare për Kërkimet Parlamentare. Modernizimi i tij është një kusht i detyrueshëm dhe pjesë e diskutimit të plotë për përmirësimin e kuadrit legjislativ në lidhje me bashkatdhetarët tanë jashtë vendit.

“Ky ligj është miratuar para më shumë se 20 vitesh dhe vlerësimi i të gjithëve është se ai nuk është më adekuat në situatën e tanishme.”

Në vitin 2021, në Bullgari u zhvillua regjistrimi i popullsisë dhe të dhënat statistikore treguan së bullgarët janë pakësuar me 11,5% në dhjetë vitet e fundit. Sipas Institutit Kombëtar të Statistikave, numri i tyre aktualisht është 6 520 000. Arsyet për këtë janë komplekse, por një prej tyre është emigracioni:

“Ne jemi të qartë se qytetarët që kanë zgjedhur të vendosen në një nga vendet anëtare të BE-së janë jashtëzakonisht të lëvizshëm dhe shpesh ndryshojnë vendndodhjen e tyre”, tha Antoaneta Coneva. Sipas saj, me rëndësi të madhe është motivi më i zakonshëm i emigrimit të bullgarëve dhe ai është humbja e perspektivës për zhvillim. – Ata këmbëngulin për paga më të larta, realizim më të mirë profesional dhe ambient të mirë për rritjen e fëmijëve të tyre. Kur i përmirësojmë këto kushte dhe ato fillojnë t'u afrohen atyre mesatare evropiane, atëherë njerëzit do të fillojnë të mendojnë për kthimin e tyre. Detyra jonë si politikanë është që ta pastrojmë mjedisin korruptiv në të cilin janë robër institucionet bullgare. Përndryshe, deklaratat për zgjidhjen e çështjes se si politikanët t'i motivojnë bullgarët për t'u kthyer, do të tingëllojnë më shumë si parulla", shtoi kryetarja e Komisionit për Politikat për Bullgarët Jashtë Shtetit.

Sipas saj, duhet të përcaktohet shumë qartë se ku dhe me çfarë përqendrimi janë bashkësitë bullgare në botë, që të shpërndahen resurset e shtetit bullgar në mënyrë adekuate.

Me rëndësi të madhe është përmirësimi i reputacionit të Agjencisë Shtetërore për Bullgarët Jashtë Shtetit. Ai u dëmtua rëndë pasi kryetari i saj u arrestua në vitin 2018 dhe u akuzua si drejtues i një grupi kriminal për tregti me dokumente të nevojshme për marrjen e nënshtetësisë bullgare. Tani duhet bërë shumë përpjekje në drejtim të intensifikimit të pjesëmarrjes së Agjencisë për Bullgarët Jashtë Shtetit në rrjetin e institucioneve që punojnë me dhe për komunitetet tona jashtë vendit - tha Antoaneta Coneva.

Në intervistën e saj për Radio Bullgarinë, Antoaneta Coneva shpalli gjithashtu themelimin e Këshillit Publik të Komisionit Parlamentar për Bullgarët Jashtë Shtetit. Ai do të ketë funksione këshillimore dhe do të ndihmojë në identifikimin, diskutimin dhe zgjidhjen e çështjeve që kanë të bëjnë me komunitetet bullgare jashtë shtetit. Në të do ta kenë vendin e vet edhe përfaqësuesit e mediave publike. Sipas zonjës Coneva, Radio Bulgaria - faqja shumëgjuhëshe e Radios Kombëtare Bullgare, gjithashtu është një partner i besueshëm për punën e plotë të komisionit parlamentar, të drejtuar nga ajo:

“Dëshiroj shumë që t'i shfrytëzojmë edhe kontaktet tona me Radio Bullgarinë si një mundësi për të informuar bashkatdhetarët tanë jashtë vendit për punën tonë.”

Përgatiti në shqip: Vesella Mançeva

Më shumë nga rubrika

Maria, bullgare etnike nga Çushmelij: Jeta është ndalur për ne

Lufta është një gjë e keqe. Ajo lë pas qytete të rrënuara, fate njerëzore të ngatërruara dhe shumë pikëllim. Konflikti në Ukrainë, i cili megjithëqë po ziente prej kohësh na befasoi. Me gjakun e viktimave të pafajshme provokoi një valë simpatie dhe..

botuar më 22-05-16 1.53.MD

Informacion, dezinformim, propagandë... Ku është Bullgaria në kërkim të së vërtetës

Informacion, dezinformim, propagandë... Ku është Bullgaria në kërkim të së vërtetës dhe të prezantimit të fakteve, të tilla siç janë? Sipas Indeksit vjetor të lirisë së fjalës të Organizatës “Reporterë pa kufij”, e cila çdo vit vlerëson mediat në..

botuar më 22-05-16 7.15.PD
Kalin Nikollov

Projekti bullgar Decarbonizer është i përfshirë në luftën kundër emetimeve të dëmshme

Përpara ca kohe ju treguam për ekipin e shkencëtarëve nga Instituti i Elektrokimisë dhe Sistemeve Energjetike pranë Akademisë Bullgare të Shkencave, të cilët u nisën për të zbuluar metoda të reja të prodhimit të hidrogjenit për të parandaluar..

botuar më 22-05-15 10.15.PD