Më 27 dhe 28 tetor, kreu i shtetit bullgar Rumen Radev do të vizitojë Moldavinë me ftesë të Presidentes së Moldavisë Maja Sandu. Vizita do të jetë në kontekstin e 30 vjetorit të vendosjes së marrëdhënieve diplomatike mes Bullgarisë dhe Moldavisë. Ndër temat e diskutuara do të jetë thellimi i marrëdhënieve tregtare dhe ekonomike ndërmjet dy vendeve, bashkëpunimi në fushën e integrimit evropian dhe kushtet për ruajtjen e kulturës dhe identitetit kombëtar të diasporës së shumtë bullgare në vend. Sipas të dhënave zyrtare, komuniteti ynë në Moldavi numëron mbi 50 000 njerëz, dhe bullgarët janë grupi i gjashtë më i madh etnik atje.

Më 28 tetor, kreu i shtetit bullgar do të vizitojë qytetin Taraklija dhe do të marrë pjesë në festimet me rastin e Ditës së Bullgarëve Besarabë - 29 Tetori. Dita e Bullgarëve Besarabë është ndër festat më të rëndësishme për komunitetin bullgar në Moldavi. Presidenti do të përshëndesë të pranishmit në një ceremoni në Universitetin Shtetëror të Taraklisë “Grigorij Cambllak”.

• Dita e bullgarëve të Besarabisë është festë e shpirtit bullgar

Në kuadër të vizitës së tij në Moldavi, kreu i shtetit bullgar do të vizitojë Liceun Teorik Bullgar “Vasill Levski” në Kishinau. Rumen Radev do të bëjë homazhe edhe para monumentit “Shipka” në kryeqytetin moldavian.