Ministrat e jashtëm të vendeve të G7 dënuan “retorikën e papërgjegjshme bërthamore” të Rusisë si “të papranueshme” dhe i bënë thirrje Kinës që të veprojë si një anëtare e përgjegjshme e komunitetit ndërkombëtar, njoftoi  Reuters. Në komunikatën nga takimi treditor në resortin japonez Karuixava thuhet: “Çdo përdorim i armëve kimike, biologjike apo bërthamore nga Rusia do të përballet me pasoja të rënda”.

“Ne mbetemi të përkushtuar për forcimin e sanksioneve kundër Rusisë, koordinimin e tyre dhe zbatimin e plotë të tyre”, thuhet gjithashtu në komunikatën e ministrave të G7.

Presidenti rus Vlladimir Putin vizitoi të hënën territoret e okupuara të Ukrainës për Pashkët. Ai ishte në selinë e grupit “Dnepër” në rajonin Herson dhe në Lugansk, në shtabin e grupit “Vostok”, ku dëgjoi raportet e komandantëve për mbrojtjen e përgatitur të dy rajoneve, njofton UNIAN.