"Në total, udhëtimet që presim janë nga 900 mijë deri në 1 milion gjatë pushimeve – po flasim për datat nga 1 deri në 10 maj. Kjo do të thotë se rreth 800 mijë bashkatdhetarë tanë do të udhëtojnë në Bullgari dhe 150 mijë të tjerë do të udhëtojnë jashtë vendit. Por këtu po flasim për të gjitha format e turizmit, duke përfshirë edhe vizitat e të afërmve dhe miqve. Dhe nëse në vitet e mëparshme për këtë periudhë kemi pasur rreth 600 mijë bullgarë udhëtues, tani ata janë rreth një milion, që është një rritje serioze".

Këtë vit ne festojmë 1 Majin, Pashkët dhe Shën Gjergjin njëri pas tjetrit në fillim të majit. Ndaj njerëzit po bëjnë masivisht një pushim të gjatë pranveror duke kombinuar ditët e pushimit me një ose dy ditë leje pune të paguara. "Rritja e pritshme e çmimeve në sektor është midis 5 dhe 10%, por kjo është normale, sepse kërkesa përcakton ofertën. Dhe bullgari tashmë ka rezervuar pushimet e tij më herët, gjë që i lejon atij të planifikojë më mirë shpenzimet e tij gjatë udhëtimit" - thotë Konstantin Zankov.

Inflacioni, luftërat në Ukrainë dhe Lindjen e Mesme, paqëndrueshmëria politike dhe zgjedhjet e ardhshme nuk ndikojnë në asnjë mënyrë në qëllimet e banorëve për të udhëtuar. E njëjta gjë vlen edhe për turistët e huaj, të cilët zgjedhin Bullgarinë këtë pranverë si një destinacion të lirë dhe tërheqës.

"Për festat e Pashkëve presim rreth 80 mijë të huaj në Bullgari. Për shumë prej tyre, Bullgaria është një destinacion tradicional për Pashkë dhe për një udhëtim pranveror dhe për verën që po afron. Dhe sa i përket sezonit të verës, pritet të jetë një sezon shumë i mirë. Kemi më shumë fluturime të prenotuara nga Mbretëria e Bashkuar, rezervime jashtëzakonisht të shumta nga tregu polak dhe një rritje të lehtë në tregun gjerman, ku fatkeqësisht nuk kemi rikuperuar ende ritmin e mëparshëm. Arsyeja është se sezoni aty planifikohet shumë më herët për të pasur fluturime çarter. Shpresojmë që më në fund të arrijmë nivelet e vitit 2019, që ishte një rekord për turizmin në mbarë botën”, shpjegon Konstantin Zankov.

Sipas tij, pranimi i Bullgarisë në Shengen nga ajri dhe uji nuk ndikon në turizmin tonë, por e bën më të shpejtë dhe më të këndshëm udhëtimin e bullgarëve dhe të huajve. “Megjithatë, pranimi i Bullgarisë në Shengen me rrugë tokësore do të çojë në një rritje serioze të numrit të udhëtimeve për në Bullgari dhe nga Bullgaria”, thotë për ta përmbyllur Konstantin Zankov në një intervistë për Radio Bullgarinë.