Një delegacion shtetëror bullgar sjell në Vatikan simbolet bullgare të paqes dhe unitetit shpirtëror

botuar më 24-05-21 7.30.PD

Foto: Arkiv personal Nikolay Deliyanev

Çdo vit në prag të festës së vëllezërve të shenjtë Kiril dhe Metodi, të alfabetit, arsimit dhe kulturës bullgare dhe letërsisë sllave - 24 maj, një delegacion bullgar i kryesuar nga kryetari i Kuvendit ose kreu i shtetit priten në audiencë nga kreu i Kishës Katolike Romake në Vatikan. Këtë vit, delegacionin shtetëror më 22 dhe 23 maj do të udhëheqë personalisht presidenti Rumen Radev.

Në ditën e parë të vizitës, kreu i shtetit do të marrë pjesë edhe në prezantimin e ekspozitës “Atoni në vizatime dhe fotografi” në Universitetin Papnor Lateran në kryeqytetin italian. Presidenti do të vizitojë edhe bazilikën "Santa Maria Maggiore", ku në shekullin e IX Papa Adriani II bekoi alfabetin bullgar.

Çdo vit delegacioni bullgar i dhuron kreut të Kishës Katolike Romake një dhuratë që shpreh respektin e popullit bullgar për besimin dhe për simbolet që bashkojnë botën ortodokse dhe katolike. Çdo herë, një nderim i veçantë i bëhet punës së ndriçuesve Sllavë, vëllezërve të shenjtë Kiril dhe Metodi, të cilët krijuan alfabetin bullgar, i cili sot është alfabeti i tretë i BE-së dhe njihet si një trashëgimi kulturore e përbashkët e Evropës.

Shkronjat bullgare - nga e para tek e fundit - janë pikturuar në veprën e tij nga piktori Nikollaj Delijanev, i cili është me origjinë nga qyteti i Sandanskit, por që jeton në Romë për afro 30 vjet. Puna e tij plastike, në formën e një libri të hapur, do t'i jepet si dhuratë Papa Françeskut gjatë vizitës së delegacionit tonë shtetëror.

"Me këto shkronja (të pikturuara në një bazë druri) doja të bëja një lloj mesazhi, sepse deri në këtë moment nuk kishte një vështrim të tillë të alfabetit bullgar si "alfa dhe omega" – në një farë mënyre alfabeti ynë në formë të plotë, nga fillimi deri në fund. Duhet të mendojmë se ka gjithmonë një fillim dhe një fund, por arti është i pakufishëm dhe krijon ndjesinë se aftësitë njerëzore janë të pakufishme." – thotë piktori Nikollaj Delijanev në një intervistë për Radio Bullgarinë:

"Ideja erdhi nga At Prof. Ivan Ivanov, përgjegjës për Kishën Bullgare në Romë, dhe me afrimin e festës së vëllezërve, Shenjtorëve Kirili dhe Metodi, vendosëm të bëjmë një mesazh për paqe dhe një mesazh përmes fesë, për bashkëpunim mes feve. Ai përmbahet në kompozimin që përshkruan një libër të shenjtë, dhe aty është alfabeti bullgar - Falë këtij alfabeti është shkruar edhe historia jonë shekullore. Prandaj ashtu si shkronjat edhe besimi na kanë ruajtur si popull dhe kanë ndihmuar në ruajtjen e traditave tona."

Teknika me të cilën pikturon Nikollaj Delijanev është një lloj iluzioni optik nëpërmjet përzierjes së ngjyrave dhe formave. Perceptohet sikur shikuesi “zhytet” në një dimension tjetër të pikturës. Ky është një shkrim specifik i piktorit dhe libri i hapur me shkronjat është realizuar me të njëjtën teknikë.

"Unë ia kam kushtuar punën time alfabetit tonë, sepse është i vetmi i këtij lloji në botë, dhe shumë pak njerëz kanë fatin të krijojnë alfabetin e tyre unik në të cilin të shkruajnë librat e tyre. Kështu që puna ime është një shenjë admirimi për këtë vepër dhe dua të tregoj për të në mënyrën më të mirë të mundshme. Falë artit, bota ruan një ekuilibër. Falë artit, bukuria mbetet gjithmonë e gjallë dhe mesazhet e mira ruhen. Kur ka art rreth nesh, ka shpresë se bota do të shpëtohet nga shkatërrimi."

Shumë shpejt u bë e qartë se Mitropoliti i Evropës Perëndimore dhe Qendrore Antonij, i cili do të jetë në pelegrinazh në varrin e Shën Kirilit më 22-23 maj, do t'i japë një bekim të veçantë veprës së Nikollaj Delijanev. Kjo do të bëhet në Bazilikën e San Clemente, ku është varri i Shë Kirilit Filozof.

"Kjo më gëzoi shumë sepse e mora si një akt simbolik me të cilin alfabeti ynë i kthehet krijuesit të tij. Unë jam shumë i prekur nga kjo dhe jam mirënjohës që do të ketë një bekim nga Mitropoliti Antonij përpara audiencës tek Papa Françesku" – thotë piktori Nikollaj Delijanev.

Foto: Facebook /Nikolay Deliyanev, Kisha Ortodokse Bullgare në Romë

Përgatiti në shqip dhe publikoi: Kostandina Bello

Последвайте ни и в Google News Showcase, за да научите най-важното от деня!

Ndaje

Një delegacion shtetëror bullgar sjell në Vatikan simbolet bullgare të paqes dhe unitetit shpirtëror

Më shumë nga rubrika

Mbreti bashkues Boris III në kujtimet e djalit të tij Simeon Sakskoburggotski

Elena Doskova – Ricardi shkruan emrin e saj në histori si bullgarja e parë që këndoi në La Scala

Llazar Dobriç mbetet i vetmi artist i cirkut që realizoi "Trapezin e vdekjes"