Arkitekti i ri nga Sofja, Rumen Xhagarov e ka marrë përsipër këtë gjë si një lloj proteste kundër shpopullimit të fshatit bullgar, por edhe me një shembull personal se si mund të ndodhë ndryshimi. Ai u kthye në shtëpinë e gjyshit të tij në Novo Sello të Vidinit (Bullgaria Veriperëndimore) duke dashur të largohej nga qyteti në periudhën e pandemisë dhe gjithashtu nga dëshira për të restauruar ndërtesën e rrënuar të familjes. Deri në vitin 2021 për Rumen Xhagarovin fshati ishte vend për shëtitje dhe kujtime fëmijërie. Megjithatë, sot është një fushë për kreativitet, për realizim profesional dhe për realizimin e ëndrrave më të guximshme.

Arkitekti i diplomuar në degën "Historia dhe Teoria e Arkitekturës" në Universitetin e Arkitekturës, Ndërtimit dhe Gjeodezisë (UASG) nuk kurseu kohë dhe përpjekje për të realizuar projektin e parë pasuniversitar në jetën e tij – të restauronte shtëpinë më shumë se 100 vjeçare.

“Shtëpia ime është ende në proces restaurimi, por koncepti është që të jem në gjendje të përdor sa më shumë teknika ndërtimi si dhe materiale natyrore dhe në këtë mënyrë ta ruaj atë siç ishte në formën e saj origjinale – shpjegon arkitekti i ri në intervistën për programin “Hristo Botev” të BNR-së, dhe vazhdon: - Në fakt, për të arritur “standardin e jetesës” – siç e quajmë ne arkitektët, d.m.th. në mënyrë që kjo shtëpi të jetë e rehatshme në shekullin e XXI-të, unë mbështetem kryesisht në një organizim të planifikuar dhe në përdorimin e materialeve moderne në një masë sa më të vogël - në dhoma më specifike, siç është banjo, për shembull. Sepse dikur nuk kishte banjë dhe dhoma të lagura, por tani ato janë një domosdoshmëri dhe duhet të ketë dushe, tualet dhe lavatriçe në shtëpi. Pavarësisht se sa vështirësi kam pasur në procesin e ndërtimit ose gjatë dimrave të gjatë kur njerëzit në fshat pakësohen ndjeshëm, nuk e kam pasur kurrë këtë ide për të hequr dorë nga gjithçka dhe për të bërë gati valixhen për t'u kthyer në qytetin e madh."

Kthimi në fshat është si një ëndërr e realizuar për arkitektin e ri nga Sofja. Me këtë ai dëshmon se jeta rurale në kohët tona moderne është e mundur dhe njëkohësisht i sjell ndjenjën e kënaqësisë dhe përmbushjes një të riu.

“Duhet të protestojmë kundër krizës demografike dhe këtij shpopullimi, sidomos të të gjitha fshatrave kufitare të Bullgarisë. Novo Sello është një fshat shumë i madh dhe nëse njeriu gjendet në qendër të tij, do të ndihet sikur është në një qytet të vogël. Gjithçka është e rregulluar atje, kemi rrugë të asfaltuara, një kullë sahati, një bashki, një zyrë postare dhe të gjitha llojet e ndërtesave administrative dhe publike, kur e ndjej se duhet të eci dhe të pushoj pak, mund të arrij shumë lehtë në fushë, dhe në të njëjtën kohë, nëse kam ndonjë punë, shkoj shpejt në qendër - është 3-4 minuta nga shtëpia ime."

E ardhmja, në të cilën Rumen Xhagarov, si çdo i ri, përpiqet të shikojë, është më e qetë, më afër natyrës, por në të njëjtën kohë në fshat mund të kesh të gjitha komoditetet që ofron mjedisi modern urban - reflekton në lidhje me këtë temë për jetën rurale në shekullin XXI, arkitekti Rumen Xhagarov.

Përgatiti në shqip dhe publikoi: Kostandina Bello