Pasi të shtunën Ministrja e drejtësisë Cecka Caçeva dhe Zv.Ministrja e rinisë dhe sportit Vanja Koleva dhanë dorëheqje për shkak të akuzave se kanë përvetësuar në mënyrë të dyshimtë apartamente në Sofje, kryeministri Bojko Borisov pranoi dorëheqjet e tyre, kurse Zv.Kryeministri Tomisllav Donçev komentoi para mikrofonit të Radios Kombëtare Bullgare se skandali “ka potencial të shkaktojë tronditje, posaçërisht në situatën parazgjedhore”. Sipas Donçevit akoma çështja nuk është zhvilluar deri në fund dhe ka nevojë për sqarime nga ana e kryetarit të partisë qeverisëse GERB Cvetan Cvetanov. Nga koalicioni i majtë “Partia Socialiste Bullgare për Bullgarinë” deklaruan se insistojnë jo vetëm për dorëheqjen e liderit të GERB-it Cvetanov, por edhe për largimin e tij nga politika bullgare. Pritet se këtë javë çështja do të diskutohet gjerësisht dhe në sallën plenare të Parlamentit.