Më të vegjlit në Radion Kombëtare Bullgare (BNR) - Grupi Vokal “Radiodeca” me dirigjenten Ilina Todorova - do të ngjitet edhe një herë në skenën e Studios sonë emblematike të Parë më 18 maj në orën 19:00 për të na prezantuar muzikë nga filmat bullgarë dhe ndërkombëtarë për fëmijë. Kësaj radhe bashkë me ta në skenë do të jenë edhe muzikantët nga Big Bendi i BNR-së me dirigjent Antoni Donçev, si dhe aktori Simeon Vlladov. Koncerti titullohet “Filmat e fëmijërisë” dhe është i pritur prej kohësh, sepse u planifikua që para pandemisë. Ilina Todorova tregon:
“Ky është një projekt që e kemi bërë më parë, por atëherë nuk arritëm të mbulojmë të gjithë programin. Dhe tani fëmijët tanë do të interpretojnë të gjitha këngët nga ky koncert. Së pari janë këngë bullgare nga filmat për fëmijë, pastaj janë këngë nga filmat vizatimorë të famshëm botëror, si “Mbreti Luan”, “Kërkimi i Peshkut Nemo”, “Libri i Xhunglës” - të gjitha të preferuarat e fëmijëve. Nga filmat bullgarë duam të kujtojmë këta tituj me të cilët u rritën breza të tëra, si “Iriqët lindin pa gjemba”, “Provimet në asnjë kohë”, “Filjo dhe Makenzen”, “Pushime të papritura”... Filmat u krijuan në vitet 70-të dhe 80-të të shekullit të kaluar, por këngët janë shumë të bukura, me një melodi të këndshme. Vetë këngët janë unike, ato mund të ekzistojnë jashtë filmit dhe mendoj se e vërtetuan këtë për kaq shumë vite.”
Në koncert, para çdo interpretimi, do të tregohet historia e krijimit të këngës - kur dhe nga kush u krijua, çfarë është subjekti i filmit. Shumica e melodive bullgare janë të kompozitorit Petër Stupell, me të cilin interpretuesit shënojnë 100 vjetorin e lindjes së tij.
Ditë pas koncertit, formacioni “Radiodeca” do të përballet me një sfidë tjetër - ata nisen për në qytetin francez Ljosh, ku nga 21 deri më 26 maj do të prezantojnë Bullgarinë në Festivalin Ndërkombëtar të Arteve në Luginën e Loara. Ata tashmë kanë katër shfaqje të suksesshme atje, madje gjatë pandemisë morën pjesë disa herë online. Tani koncertet u rikthyen dhe këngëtarët tanë të vegjël do të takojnë miqtë e tyre nga Meksika, Jordania, Vietnami, Italia…
“Dua që të gjithë njerëzit që janë atje të shohin se ka fëmijë të mrekullueshëm dhe të talentuar bullgarë, të cilët këndojnë mirë, flasin gjuhë... Në të njëjtën kohë, ata mund të komunikojnë edhe përmes artit. Kjo është diçka shumë e vlefshme që u jep atyre një shtysë dhe e bën ata të synojnë drejt të së mirës dhe të së bukurës.”
Për të prezantuar Bullgarinë, këngëtarët tanë të vegjël kanë përgatitur një video me dron mbi shkëmbinjtë e qytetit Bellogradçik. Tradicionalisht ata vizitojnë edhe një nga klasat e shkollës prestigjioze ndërkombëtare “Sent Deni”, ku studiojnë fëmijë nga e gjithë bota – SHBA, Koreja e Jugut, Kazakistani etj. Nxënësit u bëjnë pyetje fëmijëve tanë për vendin e tyre dhe bëjnë flamurin kombëtar të vendit vizitues nga letra. Koristët e vegjël të radios u përgjigjen pyetjeve për Bullgarinë, këndojnë himnin kombëtar, shpjegojnë përmbajtjen e teksteve të këngëve që interpretojnë - fëmijët komunikojnë dhe në këtë mënyrë secili prej tyre është një ambasador i vogël i kulturës bullgare.
Në video mund të dëgjoni disa nga këngët e koncertit “Filmat nga fëmijëria”, me personazhet kryesore - Grupin Vokal “Radiodeca” dhe Big Bendin e BNR-së, me dirigjentë Ilina Todorova dhe Antoni Donçev.
Përgatiti në shqip: Svetllana Dimitrova
Foto: arkiv, BNR, Ani Petrova
Lili Ivanova është prima e padiskutueshme e muzikës bullgare. Përveç talentit, disiplinës dhe përkushtimit, pas dekadave në krye qëndron edhe zgjedhja e saj e muzikantëve më të mirë me të cilët këngëtarja ka punuar ndër vite. Para pak..
Projekti "Dashuri dhe këngë" takon në skenë breza artistësh të dashur bullgarë, të cilët ndër vite krijuan hite në stile të ndryshme muzikore. Grupi “Diana Ekspres” , i cili feston 50 vjetorin në skenë, vëllezërit Argirovi , legjenda e..
“Bërë për mua” është kënga e tretë prej autore e këngëtares së re dhe të talentuar Elia Todorova, të cilën ajo vetë e cilëson si më dinamike në repertorin e saj. Dy projektet e suksesshme - "Re" dhe "Mjedra" - i sollën asaj popullaritet si solo..
Festivali muzikor Breeze by Exit do të mbahet në qytetin tonë të Detit të Zi, Varna nga 15 deri më 18 gusht. Forumi muzikor është bashkim i dy..
“Horizont” është një grup me një histori 40-vjeçare. I formuar në vitin 1984 nga shokët e klasës dhe miqtë, grupi i ka mbetur besnik rock-ut melodik..