Kreu i shtetit nënshkroi dekretin, me të cilin u arrit shkarkimi i parakohshëm i Prokurorit të Përgjithshëm, shkarkim ky i cili është i pashembullt në historinë demokratike bullgare. Kështu, në mesin e mandatit të tij shtatëvjeçar, Ivan Geshev pushon së qeni Prokuror i Përgjithshëm.

"Nuk ka asgjë për të komentuar. Presidenti ka respektuar kompetencat e tij kushtetuese dhe çdo shkronjë të tekstit të Kushtetutës dhe ligjit. Tani e tutje është punë e Kuvendit Popullor dhe Këshillit të Lartë Gjyqësor", tha Nënpresidentja Ilijana Jotova.

“Po vjen debati për zgjedhjen e Prokurorit të Përgjithshëm”, tha anëtari i Këshillit të Lartë Gjyqësor, Georgi Kuzmanov. Brenda një jave, Këshilli i Lartë Gjyqësor duhet të hapë sa më shpejt procedurën për zgjedhjen e titullarit. Sipas ligjit, kandidatura mund të propozojnë të paktën tre anëtarë të Kolegjiumit të Prokurorëve, si dhe Ministri i Drejtësisë. Kolegjiumi i Prokurorëve gjithashtu duhet të vendosë se në çfarë posti prokurorial do të mbetet Geshev dhe kush do ta zëvendësojë atë derisa të zgjidhet një titullar i ri.

Reagimi i parë i vetë Geshev pas largimit nga posti i Prokurorit Nr. 1 ishte në Facebook: “Nuk ka gjë më të rëndësishme në botë se e vërteta. Drejtësia është rezultat i së vërtetës. A do të mundin këta "politikanë" që e shtrembëruan të vërtetën dhe më hoqën padrejtësisht për shkak të fjalëve "plehra politike, më falni për shprehjen" - të marrin miratimin e njerëzve?”

Përsëri në rrjetin social, bashkëkryetari i “Po e vazhdojmë ndryshimin”, Kirill Petkov, ka komentuar edhe ndryshimet personale në Prokurori dhe në Komisionin Kundër Korrupsionit dhe për Konfiskimin e Pasurisë së Përfituar në Mënyrë të Paligjshme: “Sotir Cacarov nuk është më kryetar i Komisionit Antimafia. Ivan Geshev nuk është më Prokuror i Përgjithshëm. Njëri më padit personalisht, tjetri më kërkon imunitetin pas 2 vitesh procedura të mbyllura. E rëndësishmja është që ndryshimi po vazhdon”.

Sotir Cacarov, i cili është prokuror në Prokurorinë e Lartë të Kasacionit dhe drejton departamentin "Analiza Normative", ku përgatiten mendimet për projektligjet dhe rastet kushtetuese, tha për gazetën "24 Çasa": "... Kirill Petkov nuk është më kryeministër. Kirill Petkov formoi një koalicion me Bojko Borisov. Kirill Petkov diskuton ndryshimet në Kushtetutë me Deljan Peevskin. E rëndësishmja është që ndryshimi që Kirill Petkov ua premtoi gjithë popullit tonë po vazhdon”.

Tash e tutje është i rëndësishëm reformimi i institucionit të Prokurorisë, tha në Parlament bashkëkryetari i grupit parlamentar të koalicionit qeverisës "Po e vazhdojmë ndryshimin - Bullgaria Demokratike" (PP-DB), Atanas Atanasov. “Duhet debatuar nëse një figurë e tillë duhet të ekzistojë fare. Këtu, për mendimin tim, problemi qëndron tek Kuvendi i Madh Popullor”, theksoi Atanasov.

Hristo Ivanov, bashkëkryetar i PP-DB, në një deklaratë parlamentare theksoi se ndryshimi i Prokurorit të Përgjithshëm nuk do të ishte i mundur pa rolin e opinionit publik dhe shoqërisë civile në Bullgari, e cila ka deklaruar se nuk do të tolerojë “një pushtet të papërgjegjshëm, arrogant" dhe politikanët bullgarë këtë e kanë kuptuar". Si një hap tjetër në reformën në drejtësi, Ivanov vuri në dukje ndryshimet në Kushtetutë. "Largimi i Geshevit është një ngjarje që ia vlen të vlerësohet. Ka vlerësime pozitive por edhe skeptike që thonë se ata që e zgjodhën, po ashtu e zbritën në një procedurë që ngjall dyshime. Njerëzit që shprehin dyshime i kanë arsyet e tyre."

• Stuhia në krye të prokurorisë është një sinjal i krizës në menaxhimin e shtetit

Përpiloi: Ivo Ivanov

Përgatiti në shqip: Vesella Mançeva