Pothuajse çdo djalë tregon një interes të padiskutueshëm për makinat që në moshë të vogël, dhe kur fillon të njohë markat dhe modelet, shpesh fillon të sfidojë prindërit e tij që të gjejnë se cilat janë markat e makinave që kalojnë nëpër rrugë. Një nga profesionet që ëndërron, përveç të qenit astronaut, më së shpeshti është pikërisht garues makinash. Bashkëbiseduesi ynë, Milen Ivanov, nuk u bë garues makinash, por ishte i rrethuar nga makinat sepse punoi 7 vjet në një tuning car studio të njohur bullgare. Sot makinat vazhdojnë të jenë pjesë e jetës së tij, por vetëm si projekte në version dixhital. Përkushtimi i tij ndaj dizajnit të automjeteve mund të thuhet se tashmë është shpërblyer, pasi automjeti i tij fuoristradë i krijuar për një videolojë i impresionoi pronarët e një studioje në Los Anxhelos, të cilët vendosën të prodhojnë dhe tregtojnë modelin. Kështu lindi xhpi Rezvani Vengeance.

“Unë personalisht nuk prisja të tregohej kaq shumë interes për xhipin tim dhe dëshirë nga ana e një kompanie për ta prodhuar. Kur isha duke e krijuar, mendoja se nuk duhej të ishte aq futurist dhe të ishte diçka që mund të realizohej - thotë Milen Ivanov në një intervistë për Radio Bullgarinë. –“Modeli origjinal kërkonte një rregullim të madh. Secili prej modeleve duhej të plotësonte një çmim të caktuar në mënyrë që kompania të përshtatej brenda buxhetit të përmendur. Vlera e opsionit të parë që u paraqita ishte rreth 1 milion dollarë”.

Çmimi ishte shumë i lartë, ndaj kompania vendosi të ulë vlerën e investimit të tyre, gjë që bëri të nevojshme heqjen e disa elementeve dhe shtesave të xhipit. Një nga ndryshimet lidhej me dyert, të cilat sipas dizajnit origjinal supozohej të mbeteshin të tipit "Dallëndyshe".

"Për të hapur një derë të blinduar në këtë mënyrë kërkohen mekanizma dhe programe sigurie krejtësisht të ndryshme, sepse nëse një derë e tillë bie mbi këmbën e klientit, mund ta imagjinoni se çfarë mund të ndodhë." Lajm numër një dhe reputacion i shkatërruar, si për kompaninë ashtu edhe për krijuesin e këtij dizajni. Prandaj, kompania vendosi ta shesë xhipin me një çmim më të ulët dhe të përballueshëm, pa këtë shtesë. Pra, vlera aktuale e ulët është rreth 270,000 dollarë dhe mund të shkojë deri në 700,000 dollarë, në varësi të përmirësimeve që klienti dëshiron të porosisë. Megjithatë, ne u përpoqëm të mbanim rreth 60% të dizajnit origjinal.”

Deri më tani janë prodhuar tre xhipe dhe qëllimi i kompanisë është të bëjë nga 25 në vit për t'i ofruar në zyrën e saj në Los Angeles.

Edhe pse ai është i përfshirë në mënyrë aktive në procesin e nxjerrjes së makinës në treg, Mileni nuk ka pasur ende mundësinë të shkojë në Qytetin e Engjëjve, pasi është plotësisht i përkushtuar për t'u kujdesur për dy fëmijët e tij, të cilët janë shumë të vegjël për të udhëtuar përtej Oqeanit.

Ndërkohë, puna i ofron atij edhe sfida të reja, këtë herë të lidhura me serialet e animuar në të cilët personazhi kryesor janë makinat.

“Tashmë kemi 7 sezone me nga 7 episode. Janë prodhuar nga një studio animacioni, me licencë nga përfaqësuesit zyrtarë të "Fast and Furious". Kam punuar për 2 ose 3 vjet mbi dizajnimin e modeleve të përdorura në serial”, zbuloi Mileni dhe saktësoi se seriali është i disponueshëm në një nga platformat botërore për video.

Projekti aktual me të cilin po punon është ende sekret. E vetmja gjë e sigurt është se historia ka të bëjë sërish me makinat, ndërsa animacioni do të jetë i një lloji krejtësisht të ri.

I lindur në Dobriç, Mileni studioi në Gjimnazin Kombëtar të Arteve të Aplikuara të Shën Llukës, pas së cilës u diplomua në Akademinë Kombëtare të Arteve. Ai pranon se portretet, peizazhet dhe pikturat e llojeve të tjera të natyrës kanë qenë gjithmonë të mërzitshme për të, ndryshe nga personazhet dhe komplotet në filma të ndryshëm artistikë, vizatimorë dhe video lojëra. Për këtë arsye ai zgjedh t'i përkushtohet këtij profesioni, me të cilin jeton i lumtur edhe sot e kësaj dite.

Përgatiti në shqip: Kostandina Bello

Foto: arkiv personal