Bullgaria mbetet e përkushtuar ndaj misionit të përbashkët të zhvillimit të potencialit të shkencës në mbështetje të paqes në një botë të konkurrencës së ashpër dhe për zhvillimin pozitiv të shoqërive tona. Kështu deklaroi kreu i shtetit Rumen Radev në ceremoninë në Gjenevë me rastin e 70 vjetorit të themelimit të Organizatës Evropiane për Kërkime Bërthamore – CERN. Radev theksoi dëshirën e Bullgarisë për të ndërtuar një institut ndërkombëtar për teknologji të qëndrueshme me mbështetjen e CERN-it për trajtimin e sëmundjeve onkologjike. Në Gjenevë, presidenti u takua me shkencëtarët bullgarë në CERN, të cilëve u shprehu mirënjohjen për rezultatet e tyre shkencore dhe kontributin e tyre në vendosjen e Bullgarisë në mesin e vendeve lider në botë në fushën e kërkimit shkencor.

Viti 2024 shënon një çerek shekulli që kur Bullgaria iu bashkua organizatës. Atëherë Bullgaria ishte vendi i 20-të që iu bashkua CERN-it. Presidenti Radev vuri në dukje kontributin e mbi 100 shkencëtarëve, inxhinierëve dhe teknikëve bullgarë të cilët janë të përfshirë në projekte të ndryshme të CERN-it. Shkencëtarët bullgarë luajtën një rol të rëndësishëm në krijimin e detektorit CMS, i cili është i një rëndësie kyçe për zbulimin e grimcës së bosonit Higgs.

Lexoni më shumë nga koleksioni i Radio Bullgarisë:

• Bullgaria është e para në Evropë për nga numri i mësuesve që kanë kaluar trajnime në CERN

• Bullgaria i siguron kompjuterë CERN-it

• Theksi i politikës së brendshme: Shkencëtarët bullgarë - me kontribut në zbulimin e “Pjesëzës së Zotit” në CERN

• Marka bullgare në projektet e CERN