Në një brifing sot Ministri i Shëndetësisë prof. Kostadin Angellov, kryetari i Shtabit Operativ Kombëtar Vencisllav Mutafçijski dhe kryeinspektori i shëndetësisë Angell Kunçev paraqitën Planin kombëtar të Bullgarisë për gatishmëri në rast pandemie, të miratuar në mbledhjen e sotme të qeverisë.

Plani ka karakter të përgjithshëm dhe do të jetë i vlefshëm për të gjitha pandemitë e mundshme. Ai jep drejtimet kryesore për ndërprerjen e procesit epidemik, furnizimin me vaksina, funksionimin normal të shtetit, si dhe mesazhet, të cilat do t’i drejtohen popullsisë, tha Kunçev.

Ministri Angellov ripohoi se vaksinat për bullgarët janë të njëjtat, të cilat do t’i marrin edhe vendet e tjera anëtare të BE-së. Të gjithë shtetasit bullgarë do të vaksinohen falas dhe sipas dëshirës së tyre.

Deri në të enjten do të krijohet një Plan kombëtar i vaksinimit, i cili do të prezantohet në mbledhjen tjetër të qeverisë

Pritet që vaksinat e para të jenë në Bullgari në fund të këtij viti, ose në fillim të vitit tjetër. Deri në fund të javës do të sigurohen 4 frigoriferë për furnizimin e parë të vaksinës së “Pfizer”. Koordinator i Planit kombëtar të vaksinimit u zgjodh drejtori i përgjithshëm i Kryqit të Kuq Bullgar Krasimir Gigov.