Komisioneri i BE-së për Zgjerimin dhe Politikën Evropiane të Fqinjësisë Oliver Varheli pret që brenda 3 javësh Bullgaria të miratojë fillimin e negociatave të Shkupit për aderimin me BE. Këtë zyrtari evropian e shkroi në Twitter pas takimeve të tij më 19 maj në Sofje me Presidentin Rumen Radev, Kryeministrin Kirill Petkov dhe Ministren e Jashtme Teodora Gençovska, transmeton BGNES.

“Ne jemi duke punuar për një zgjidhje të pranueshme reciprokisht në mënyrë që të mund të realizojmë takimin e parë për të filluar negociatat me Maqedoninë e Veriut dhe Shqipërinë në qershor. E vlerësoj dialogun e hapur me Presidentin bullgar Rumen Radev. Është me rëndësi që të kemi Ballkanin Perëndimor fqinj të qëndrueshëm dhe të begatë. “Pas 3 javësh do të kthehem në Sofje për të gjetur një bazë të përbashkët dhe mbështetje në Bullgari, për të filluar procesin e negociatave me Maqedoninë e Veriut në qershor”, shkroi Varheli.