Presidenti i Maqedonisë së Veriut, Stevo Pendarovski, tha para TV24 se Shkupi i propozoi Bullgarisë që bisedimet për kohën deri në vitin 1944 t'u lihej historianëve, “dhe ne t'i përkushtohemi të tashmes”. Sipas Pendarovskit, politikanët nuk pëlqejnë “të hyjnë në diskutim se kush ishim dhe çfarë ishim”.

Pendarovski gjithashtu hodhi poshtë propozimin e Ministrit të Jashtëm Grek Nikos Dendias për ndërmjetësim midis Sofjes dhe Shkupit. “Në një mosmarrëveshje tipike ballkanike, siç është ajo e vendosur nga Sofja, unë dyshoj se një vend i tretë ballkanik mund të perceptohet si një ndërmjetës i pavarur”, tha Pendarovski. Për të, ndërmjetësit më të mirë në problemet e Ballkanit janë vendet e fuqishme të largëta, njoftoi BGNES.