"Bullgaria - magnetike dhe e bukur" - me këtë titull, blogerët bullgarë të udhëtimit prezantojnë disa nga vendet më magnetike në vendin tonë. Ekspozita me fotografi unike të realizuara nga udhëtarët mund të shihet në hyrjen e Kopshtit Detar në Varna deri më 6 tetor.

"Dëshirojmë t'u prezantojmë turistëve bullgarë dhe të huaj magjinë e Bullgarisë me shumëllojshmërinë e saj të atraksioneve natyrore dhe kulturore", thotë Stanisllav Stiljanov nga Organizata Joqeveritare ASTOM, e cila bashkon blogjet bullgare më të vizituara të udhëtimit.

"Prezantojmë gjithsej 18 foto. Ne kemi një shumëllojshmëri destinacionesh - liqene, male, pyje, manastire, formacione shkëmbore, shtigje interesante eko, fshatra autoktone... Kështu që çdo aventurier do të jetë në gjendje të gjejë një destinacion që të tërheq vëmendjen e tij dhe të motivojë atë për të bërë udhëtimin e tij të radhës në Bullgari.”

Bullgaria është magnetike dhe e bukur për shkak të natyrës së saj piktoreske, kulturës së veçantë dhe historisë mijëravjeçare, beson Stanisllav.

Blogerët bullgarë thërrasin auditorin e tyre për të njohur dhe për të dashuruar vendin tonë. Në blogjet e tyre, ata ndajnë nga veta e parë informacione të dobishme në lidhje me llojet e ndryshme të turizmit në vendin tonë, si dhe ide për udhëtime buxhetore, çfarë të shikojmë, si të arrijmë në një vend të caktuar, ku të qëndrojmë etj. “Mbi 30 blogje janë anëtarë të shoqatës sonë, shumica e të cilave i dedikohen Bullgarisë, por ka edhe të tilla për udhëtime jashtë vendit”, thotë Stanisllav dhe shpjegon:

“Disa prej tyre janë të specializuar në një lloj tjetër turizmi. Kemi të tillë që theksojnë vlerën historike të një destinacioni, të tjerë fokusohen në përparësitë e kuzhinës, kemi blogje që specializohen në udhëtimet me fushues etj. Në përgjithësi, kjo është një plejadë mjaft interesante e shokëve që shkruajnë shumë argëtues. Një pjesë e madhe e tyre janë edhe fotografë të shkëlqyer. Dmth., përmes blogjeve të udhëtimit, ne mund të bëjmë një prezantim autentik të një destinacioni përkatës” - thotë Stanisllav.

Ai vetë është autor i blogut TravelTasty.eu për udhëtimet dhe kuzhinën nëpër botë dhe në vendin tonë. Sipas tij, në epokën e komunikimit digjital, inteligjencës artificiale dhe motorëve të kërkimit në internet, çdo udhëtar mund të gjejë informacionin e nevojshëm për një destinacion të caktuar në rrjetin botëror.

“Një plus shumë i madh është se disa nga këto blogje udhëtimi janë shkruar jo vetëm në bullgarisht, por edhe në anglisht dhe janë mjaft mirë të optimizuara. Kjo do të thotë se ata arrijnë një auditor ndërkombëtar në mënyrë të shpejtë dhe të lehtë. Dmth. blogerët bullgarë të udhëtimit kanë një rol të madh në reklamimin e destinacionit Bullgaria nëpër botë. Dhe këtë e vërtetojnë si të dhënat statistikore në faqet e tyre ashtu edhe reagimet e turistëve që vizitojnë vendin tonë. Nuk është rastësi që jemi partnerë të preferuar të një sërë destinacionesh dhe biznesesh në fushën e turizmit brenda dhe jashtë vendit” - përfundoi Stanisllav Stiljanov.

Më shumë mbi temën mund të lexoni në botimet e mëposhtme të Radio Bullgarisë:

• Një ekspozitë fotografike e blogerëve të udhëtimit promovon turizmin në Bullgari

• Udhëto emocionalisht - turizmi si një përvojë autentike dhe vetmi me natyrën

Përgatiti në shqip dhe publikoi: Svetllana Dimitrova

Foto: ASTOM, Krasimira Ilieva, arkiv personal