Ministri i Punëve të Jashtme Svetllan Stoev priti ambasadorët e shteteve anëtare të Bashkimit Evropian dhe të ngarkuarin me postin Shef të Përfaqësisë së Komisionit Evropian në Bullgari. Ministri i njohu diplomatët e huaj me situatën rreth zgjedhjeve në Bullgari dhe me qëndrimet prioritare bullgare për tema nga agjenda e përbashkët evropiane.

Në lidhje me procesin e zgjerimit të BE-së në Ballkanin Perëndimor, Stoev konfirmoi mbështetjen e vazhdueshme bullgare, bazuar në meritat e secilit vend kandidat. Sipas tij, marrëdhëniet e BE-së me rajonin nuk duhet të kufizohen vetëm në zgjerim.

Stoev bëri thirrje për vëmendje dhe përkushtim të shtuar për situatën në Bosnje dhe Hercegovinë, dialogun Beograd-Prishtinë dhe zhvillime të tjera shqetësuese.

Sa i përket fillimit të negociatave për anëtarësimin e Maqedonisë së Veriut në BE, ai theksoi përpjekjet e bëra muajt e fundit nga Bullgaria për zgjidhjen e çështjeve të hapura me Shkupin. Megjithatë, nuk u arrit përparim në zbatimin e Marrëveshjes së Fqinjësisë, the Ministri, cituar nga zyra e shtypit e Ministrisë së Jashtme bullgare.

Ai shtoi se pala bullgare ende pret hapa konkretë nga fqinjët për përmbushjen e zotimeve për të hequr dorë nga pretendimet territoriale dhe minoritare, për t'i dhënë fund gjuhës së urrejtjes kundër Bullgarisë, për ndryshimin e teksteve shkollore në Maqedoninë e Veriut, duke marrë parasysh historinë tonë të përbashkët, garantimin e të drejtave të qytetarëve me vetëdije bullgare.