Java e kaluar na ofroi një dozë tjetër paqëndrueshmërie në Bullgari si në aspektin meteorologjik, ashtu edhe në atë politik. Në sfondin e reshjeve të dendura të shiut, fshatrave të përmbytura dhe pafuqisë njerëzore përballë stuhisë ujore, shpërtheu një valë sulmesh dhe mosbesimi mes dy forcave të para parlamentare që formuan qeverinë me deklaratën që të çojnë vendin përmes krizës dhe të bëjë ndryshimet e nevojshme në sistemin gjyqësor.
Tensioni shpërthye pasi kreu i GERB Bojko Borisov tha se partitë e ndryshimit kërkojnë të qeverisin vendin vetëm. Nga ana e tij, bashkëkryetari i “Po e vazhdojmë ndryshimin” (PP) Kirill Petkov kërcënoi se deputetët e koalicionit “Po e vazhdojmë ndryshimin - Bullgaria Demokratike” (PP-DB) nuk do të hyjnë më në sallën plenare, për shkak të tentativave për të shkelur marrëveshjet e arritura mes tyre dhe GERB-SDS. Pas mbledhjes së grupit të tyre parlamentar, Kirill Petkov ftoi liderin e GERB-it që të nënshkruajë Mekanizmin për garantimin e programit të reformave të kabinetit, në të cilin u regjistruan 7 kushte – për të formuar një bord të përbashkët për emërimin e shefave të rregullatorëve, për të respektuar programin e përgjithshëm legjislativ tashmë të miratuar, për të përgatitur një udhërrëfyes për reformën në drejtësi dhe kushtetutë, për të kryer një reformë në shërbimet, për të miratuar një ligj për komisionin antikorrupsion, për të rishikuar ligjin zgjedhor dhe për një qëndrim të përbashkët për ligjshmërinë e referendumit të partisë “Vëzrazhdane” në lidhje me adoptimin e euros në vendin tonë. Në këtë fazë, megjithatë, një takim lidershipi mes dy formacioneve politike nuk u zhvillua.
“Garancia më serioze për përmbushjen e këtyre angazhimeve është vullneti politik, të cilin ne e demonstrojmë jo aq me fjalë, por me vepra - tha në një intervistë për BNR deputetja nga PP-DB Antoaneta Coneva. - Vetëm veprimet do të tregonin se angazhimet paraprake mbi të cilat u formua kjo qeveri mund të çojnë në reformat e dëshiruara. Përndryshe, kabineti humbet thelbin e tij reformues dhe kuptimin e ekzistencës.”
Në fakt, lideri i GERB-it, Bojko Borisov, deklaroi gatishmërinë për të nënshkruar deklaratën nëse ajo është në formën e një marrëveshjeje koalicioni. Megjithatë, deri më tani kjo nuk ndodh.
“Sido që të mendojmë, qeverisja e re është një koalicion”, vuri në dukje dekani i Fakultetit Juridik të Universitetit të Sofjes, Prof. Daniell Vëllçev. Sipas tij, problemet dhe pasojat vijnë nga fakti se partitë pjesëmarrëse kanë turp ta pranojnë, sepse nuk ua shpjeguan zgjedhësve të tyre dhe vështirë se do të mbajnë përgjegjësinë për një hap të tillë:
“PP u krijua në emër të heqjes së Borisovit, GERB-it, modelit Borisov, modelit GERB. Ata tani janë të turpëruar që duhet të thonë: “Njerëz, ju votuat që ne të largojmë Borisovin, dhe tani ne duhet t’ia dalim së bashku me të”. Është e kuptueshme kjo bezdi, por ky do të ishte qëndrimi i ndershëm - beson ish-ministri i arsimit. - E kundërta krijon probleme shumë të mëdha në plan afatmesëm. Mund ta quajmë si të duam, por është koalicion. Në një koalicion, marrëdhëniet janë relativisht komplekse. Prandaj, është e drejtë të kemi një dokument në të cilin përshkruhet gjithçka. Njëra palë po ikën nga kjo lloj gjëje dhe kjo është arsyeja pse ne jemi në këtë gjendje. Që të jetë një qeveri e qëndrueshme, pjesëmarrësit e saj duhet të arrijnë një konsensus se si të zgjidhet çdo situatë specifike” - theksoi gjithashtu Vëllçev.
Pushtetarët u qortuan edhe nga presidenti Rumen Radev për deklaratën e ministrit të mbrojtjes Todor Tagarev se Bullgaria do të vazhdojë të mbështesë Ukrainën jo vetëm me armatim, por edhe me trajnimin e mjekëve luftarakë dhe paramedikëve që do të jenë në front dhe do të ofrojë ndihmë për të lënduarit. U kritikua edhe vendimi i qeverisë që delegacioni bullgar në Samitin e NATO-së më 11-12 korrik në Vilnius të udhëhiqet nga kryeministri Nikollaj Denkov dhe jo si zakonisht nga presidenti, i cili është komandanti suprem i forcave tona të armatosura. Sipas Radev: “kursi i qeverisë së re është ta shtyjë Bullgarinë gjithnjë e më afër luftës”.
Përkundër të çarave, kabineti për momentin po qëndron i palëkundur dhe është herët të flitet për një situatë ku vijnë zgjedhje të reja - është kategorik profesori në Universitetin e qytetit Veliko Tërnovo, Todor Gallunov.
“Konflikti i mundshëm do të vijë para zgjedhjeve lokale në vjeshtë, kur do të shtrohet çështja për kandidatët për kryetarë bashkie. Koalicioni qeverisës do të duhet të vendosë se çfarë të bëjë. PP nuk ka zgjidhje, ata duhet të vazhdojnë të respektojnë vullneti i GERB-it. Nëse bëhet fjalë për zgjedhje të parakohshme, ata nuk janë në pozitë të mirë.”
Mbetet për t’u parë nëse shkalla e tensionit politik do të vazhdojë të rritet apo nëse jemi në një periudhë më të qëndrueshme politike.
Përpilues: Joan Kolev
Përgatiti në shqip: Svetllana Dimitrova
Fotos: BGNES, Facebook / Todor Galunov
Kreu i shtetit Rumen Radev bëri thirrje për veprime konkrete të menjëhershme nga qeveria bullgare dhe institucionet evropiane për respektimin e parimeve evropiane për zgjerimin e Bashkimit Evropian. “Qeveria e re në shtetin tonë fqinj ka treguar..
Festa e Frymës së Shenjtë në Bullgari shënohet edhe si Dita e Maqedonisë. Tradita filloi pas Kryengritjes së Ilindenit të vitit 1903, pasi fillimisht ishte Dita e Luftës për Maqedoninë dhe Edrenenë, dhe pas Luftës së Parë Botërore u bë "Dita e..
Kryebashkiaku i Stambollit kritikoi marrëveshjen për emigrantët mes Turqisë dhe BE-së Kryetari i bashkisë së Stambollit dhe një kundërshtar i presidentit Erdogan, Ekrem Imamoglu, kritikoi ashpër marrëveshjen e vitit 2016 midis..
Në Turqi dhe Greqi presin një rendiment më të mirë të ullinjve Vjelja e vajit të ullirit në Turqi do të jetë rekord...